Nashik Crime : मुलीचे प्रेमप्रकरण सुरु होते, बापाला कळताच मुलीसोबत ‘जे’ केले ते भयानकच !

नाशिक / चैतन्य गायकवाड (प्रतिनिधी) : मुलीचे प्रेमसंबंध मान्य नसल्याने बापानेच पोटच्या लेकीची हत्या केल्याची धक्कादायक घटना नाशिकमधील अंबडमध्ये उघडकीस आली आहे. याप्रकरणी अंबड पोलीस ठाण्यात हत्येचा गुन्हा दाखल करण्यात आला आहे. पोलिसांनी आरोपी बापाला ताब्यात घेतले आहे. रामकिशोर भारती असे ताब्यात घेण्यात आलेल्या आरोपी पित्याचे नाव आहे. तर ज्योती भारती असे पीडित तरुणीचे नाव आहे. या घटनेमुळे परिसरात एकच खळबळ माजली आहे. अंबड पोलीस या घटनेचा अधिक तपास करीत आहेत.

मुलीचे एका तरुणाशी प्रेमसंबंध सुरु होते

नाशिकच्या अंबड लिंक रोडवरील चुंचाळे परिसरातील रामकृष्ण नगर भागात ही घटना घडली. या परिसरात राहणारे रामकिशोर भारती यांच्या मुलीचे एका मुलाशी प्रेमसंबंध होते. मुलीचे हे प्रेमसंबंध वडील रामकिशोर यांना मान्य नव्हते.

प्रेमप्रकरणावरुन वडील आणि मुलीमध्ये वारंवार भांडण व्हायचे

या कारणावरून वारंवार मुलगी आपल्या प्रियकरासोबत पळून जात होती. त्यामुळे रामकिशोर आणि त्यांच्या मुलीमध्ये वारंवार भांडण होत होते. नेहमीप्रमाणे आज देखील संशयित रामकिशोर आणि त्यांची मुलगी ज्योती भारती यांचे भांडण झाले.

राग अनावनर झाल्याने पित्याने मुलीला संपवले

या भांडणात रामकिशोर यांचा राग अनावर झाल्याने त्यांनी राहत्या घरात ओढणीच्या साहाय्याने ज्योती हिचा गळा आवळून तिची हत्या केली असल्याची माहिती पोलिसांनी दिली.

या घटनेची माहिती मिळताच वरिष्ठ पोलीस निरीक्षक भगिरथ देशमुख यांच्यासह पोलीस पथक घटनास्थळी दाखल झाले. या प्रकरणी पोलिसांनी संशयित रामकिशोर भारती याला ताब्यात घेतले असून, पुढील तपास पोलीस करीत आहे.