सातारा : नोटरी (Notary) करून चालवण्यासाठी घेतलेली वाहने परस्पर विकणाऱ्या टोळीचा सातारा पोलिसांनी पर्दाफाश केला आहे. या प्रकरणात दोन जणांना अटक करण्यात आली आहे. आरोपींनी महाराष्ट्रसह गुजरातमधील (Gujarat) देखील काही वाहने अशाच पद्धतीने विकल्याची माहिती समोर येत आहे. पोलिसांनी आरोपींकडून 24 चारचाकी जप्त केल्या आहेत. सुमारे दोन कोटी 64 लाख रुपये इतकी या जप्त करण्यात आलेल्या वाहनाची किंमत आहे. उमेश चव्हाण आणि अद्बुल कादिर असे अटक करण्यात आलेल्या आरोपींची नावे आहेत. आरोपी महाराष्ट्रसह (Maharashtra) गुजरातमधील गाड्यांचा हफ्ता थकलेल्या मालकांशी संपर्क साधायचे त्यानंतर आम्ही तुमच्या गाड्यांचा हफ्ता भरतो असे त्यांना सांगायचे. त्याबदल्यात नोटरी करून ते संबंधित वाहन चालवायला घ्यायचे. वाहन चालवायला घेतल्यानंतर आरोपी ते वाहन परस्पर विकून मोकळे व्हायचे. दरम्यान या प्रकरणात दोन आरोपींना अटक करण्यात आली असून, त्यांचा आणखी काही गुन्ह्यात सहभाग आहे का? याची चौकशी सुरू असल्याची माहिती पोलिसांनी दिली.
दरम्यान घटनेबाबत पोलिसांनी दिलेल्या अधिक माहितीनुसार संबंधित आरोपी गाड्यांचे थकलेले हफ्ते फेडतो असे सांगून, गाड्या नोटरीवर चालवायला घ्यायचे. नोटरीवर घेतलेल्या गाड्या ते परस्पर विकून मोकळे व्हायचे. या टोळीतील दोघांना अटक करण्यात यश आले आहे. पोलिसांनी संबंधित आरोपींकडून तब्बल दोन कोटी 64 लाख रुपये किमतीच्या 24 गाड्या जप्त केल्या आहेत. आरोपींची अधिक चौकशी सुरू असून, या टोळीमध्ये आणखी किती जणांचा समावेश आहे याचा तपास सुरू असल्याची माहिती पोलिसांंनी दिली.
संबंधित आरोपींनी सातारा, पुणे, मुंबई, सोलापूर, अहमदनगर, बीड, औरंगाबाद, बुलडाणा, पनवेल, ठाणे, रायगड, सांगली, गोवा आणि गुजरातच्या काही शहरांमधून वाहने परस्पर विकल्याची माहिती पोलिसांनी दिली आहे. पोलिसांनी आरोपींकडून 24 वाहने जप्त केली आहेत. या प्रकरणात दोन आरोपींना अटक करण्यात आली असून, पुढील तपास सुरू असल्याची माहिती पोलिसांनी दिली.