ड्रग्ज प्रकरणातील आरोपीची आत्महत्या, खारघरच्या क्वारंटाईन सेंटरमध्येच गळफास

नवी मुंबई : खारघरमध्ये क्वारंटाईन असलेल्या आरोपीने आत्महत्या केल्याचा धक्कादायक प्रकार समोर आला आहे. ड्रग्ज बाळगल्याच्या आरोपाखाली शिक्षा भोगत असलेल्या महम्मद सुलेमान याने क्वारंटाईन सेंटरमध्येच गळफास घेतला. गेल्या काही महिन्यातील ही आरोपीच्या आत्महत्येची तिसरी घटना आहे. (Navi Mumbai Kharghar Prisoner commits Suicide in Quarantine Centre)

तळोजा जेलमधील कैद्यांना कोरोनाची बाधा होऊ नये, यासाठी खारघरमधील गोखले हायस्कूलमध्ये विलगीकरण कक्ष तयार करण्यात आले आहेत. या ठिकाणी अनेक कैदी क्वारंटाईन करण्यात आले आहेत. महम्मद सुलेमान गेल्या चार दिवसांपासून इथे क्वारंटाईन होता. दिल्लीतील ‘एनडीपीएस’ ड्रग्ज प्रकरणातही महम्मद सुलेमान याचा सहभाग होता.

दरम्यान, खारघर पोलीस याबाबत अधिक चौकशी करत आहेत. सध्या पोस्टमार्टमसाठी त्याचा मृतदेह जे जे रुग्णालयात नेला असल्याची माहिती आहे. महम्मद सुलेमानच्या आत्महत्येचं नेमकं कारण अद्याप अस्पष्ट आहे.

तळोजा कारागृहातही तीन महिन्यांपूर्वी आत्महत्या

तळोजा येथील मध्यवर्ती कारागृहात एका कैद्याने आत्महत्या केल्याचा प्रकार तीन महिन्यांपूर्वी उघडकीस आला होता. शौचालयात चादर अडकवून त्या कैद्याने 27 मे रोजी आत्महत्या केली होती.

बालू गड़सिंगे असे आत्महत्या करणाऱ्या आरोपीचे नाव होते. त्याने पहाटेच्या सुमारास आत्महत्या केली होती. गड़सिंगे याच्यावर माजलगाव, शिवाजीनगर अशा काही ठिकाणी चार ते पाच गुन्हे दाखल होते. कलम 302 आणि 354 अंतर्गत 2017 पासून तो शिक्षा भोगत होता.

VIDEO : टॉप 9 न्यूज | 20 August 2020 https://t.co/Kxg5SNkEgE

— TV9 Marathi (@TV9Marathi) August 20, 2020

संबंधित बातम्या :

चादरीने शौचालयात गळफास, तळोजा कारागृहात कैद्याची आत्महत्या

(Navi Mumbai Kharghar Prisoner commits Suicide in Quarantine Centre)