Varsha Gaikwad : सावित्रीबाई फुलेंच्या नावे मिळणार आदर्श शिक्षक पुरस्कार, निकषात शिक्षण विभागाने केलेत बदल

मुंबई : शालेय शिक्षण विभागानं शासन निर्णय घेतला. त्यानुसार, आदर्श शिक्षक पुरस्काराचे (Adarsh ​​Shikshak Puraskar) निकष नुकतेच जाहीर केले. शालेय शिक्षणमंत्री वर्षा गायकवाड (Varsha Gaikwad) यांनी ही माहिती दिलीय. समर्पित शिक्षकांचा आदर्श शिक्षक म्हणून सन्मान केला जाणार आहे. आदर्श शिक्षक पुरस्काराला अधिक शिक्षणाभीमूख केले आहे. क्रांतीज्योती सावित्रीबाई फुले यांच्या नावानं हा पुरस्कार दिला जाणाराय. राज्यातल्या 109 शिक्षकांना आदर्श शिक्षक पुरस्कारानं गौरविण्यात येणाराय. यात प्राथमिक शाळेतील 38, माध्यमिक 39, आदिवासी क्षेत्र 8, आदर्श शिक्षिका 8, विशेष कला, क्रीडा शिक्षक 2, दिव्यांग 1, स्काऊट गाईड 2 यांचा समावेश राहणार आहे. जिल्हा निवड समितीनं (District Selection Committee) राज्य निवड समितीकडं शिफारशी पाठवायच्या आहेत.

या गोष्टींचा विचार केला जाणार

माध्यमिक व उच्च माध्यमिक शिक्षण संचालक यांच्यामार्फत पुरस्काराची निवड प्रक्रिया राबविली जाणार आहे. शिक्षकानं शैक्षणिक संशोधनपर निबंध लिहिलेले असावेत. शिक्षक शिकवित असलेल्या विद्यार्थ्यांना विविध क्षेत्रातील पुरस्कार मिळालेले असावेत. सामाजिक, शैक्षणिक, आपत्ती व्यवस्थापन, राष्ट्रीय कार्यात सहभाग हवा. राष्ट्रीय शिष्यवृत्ती, नवोदय, प्रज्ञाशोध परीक्षेचा निकाल, याचाही विचार केला जाईल. शिक्षकानं मिळविलेली रक्कम डिजिटल शैक्षणिक साहित्य निर्मितीसाठी वापरावी.

आदर्श शिक्षकांचे निकष कोणते

राज्य आदर्श शिक्षक पुरस्कारात शालेय शिक्षण विभागानं बदल केलाय. आदर्श शिक्षक पुरस्कार क्रांतीज्योती सावित्रीबाई फुले राज्य शिक्षक गुणगौरव पुरस्कार नावानं दिला जाणार. यासाठी निकष असे सलग दहा वर्षे शिक्षक म्हणून काम हवं. मुख्याध्यापकपदी सेवा पूर्ण करणारे असावेत. माहिती खोटी आढळल्यास प्रस्ताव रद्द करण्यात येणार आहेत. कोणत्याही प्रकारची विभागीय चौकशी सुरू नसावी. निरव्यसनी शिक्षकांना हा पुरस्कार दिला जाणार आहे. गेल्या पाच वर्षात किती विद्यार्थ्यांना शिक्षणाच्या प्रवाहात आणले याचा विचार पुरस्कार देताना केला जाणार आहे.

व्यसनी शिक्षक ठरणार अपात्र

शिक्षकांना दिल्या जाणाऱ्या पुरस्काराच्या निकषात बदल करण्यात आलेत. यामुळं शिक्षणाभीभूख शिक्षकांना या पुरस्कारासाठी प्राधान्य देण्यात येणार आहे. वादग्रस्त शिक्षक हे यासाठी अपात्र ठरविले जातील. शिक्षकाविरोधात विभागीय चौकशी सुरू नसावी. तसेच संबंधित शिक्षक हा व्यसनी नसावा, असं नव्या निकषात सांगण्यात आलंय.