Hanuman Ansh: आधी कोणी विचारलंही नाही, आता 400 कोटींच्या कमाईनंतर ‘हनुमान अंश 2’मध्ये सुपरस्टारची एण्ट्री? निर्मात्यांनी केला खुलासा

शोभिनव सत्या (हनुमान अंश)

Hanuman Ansh: ‘हनुमान अंश’ या अध्यात्मिक चित्रपटाने बॉक्स ऑफिसवर मिळवलेल्या यशानंतर आता त्याच्या दुसऱ्या भागाची चर्चा सुरू झाली आहे. याचदरम्यान अभिनेता अक्षय कुमार ‘हनुमान अंश 2’मध्ये दिसणार असल्याच्या बातम्यांनी सोशल मीडियावर जोर धरला. मात्र, या चर्चांवर आता चित्रपटाच्या को-प्रोड्युसर अनुप्रिया नागर यांनी स्पष्टीकरण दिलं आहे. अक्षय कुमारच्या कास्टिंगबाबत त्यांनी कोणतीही अधिकृत घोषणा केलेली नसल्याचं स्पष्ट केलं आहे. एका मुलाखतीदरम्यान अनुप्रिया नागर यांना त्यांच्या आवडत्या अभिनेत्याबद्दल प्रश्न विचारण्यात आला होता. त्यावेळी त्यांनी अक्षय कुमार यांचं नाव घेतलं. त्यानंतर त्यांना ‘हनुमान अंश’च्या दुसऱ्या भागात अक्षय कुमार दिसणार का, असा प्रश्न विचारण्यात आला. यावर अनुप्रिया यांनी ‘महाराजजी सांगतील’ अशा आशयाचं उत्तर दिलं.

याच उत्तराचा सोशल मीडियावर वेगळा अर्थ लावला गेला. अनुप्रिया यांनी अक्षय कुमारच्या कास्टिंगचे संकेत दिल्याची चर्चा सुरू झाली. पाहता पाहता ‘हनुमान अंश 2’मध्ये अक्षय कुमारची एंट्री होणार असल्याच्या बातम्या व्हायरल झाल्या.

अनुप्रिया नागर यांनी काय सांगितलं?

या चर्चांवर अखेर अनुप्रिया नागर यांनी स्पष्टीकरण दिलं आहे. हिंदुस्तान टाइम्सला दिलेल्या प्रतिक्रियेत त्यांनी स्पष्टपणे सांगितलं की, ‘हनुमान अंश 2’मध्ये अक्षय कुमारच्या सहभागाबाबत त्यांनी काहीही सांगितलेलं नाही. त्यामुळे सध्या अक्षय कुमार चित्रपटात असणार असल्याच्या चर्चा केवळ अफवांवर आधारित आहेत.

‘हनुमान अंश’ची दमदार कामगिरी

‘हनुमान अंश’ हा चित्रपट आध्यात्मिक गुरु नीम करोली बाबा यांच्या जीवनावर आधारित आहे. चित्रपटात शोभिनव सत्य यांनी नीम करोली बाबांची भूमिका साकारली आहे, तर पूर्णिमा तिवारी यांनी त्यांच्या पत्नी रामबेटी यांची भूमिका केली आहे. विशाल चतुर्वेदी यांनी या चित्रपटाचं दिग्दर्शन केलं आहे. विशेष म्हणजे, अत्यंत कमी बजेटमध्ये तयार झालेल्या या चित्रपटाने प्रेक्षकांचं लक्ष वेधून घेतलं आहे. चित्रपटाने जगभरात 400 कोटी रुपयांचा टप्पा पार केला आहे. त्यामुळे ‘हनुमान अंश 2’कडूनही प्रेक्षकांच्या अपेक्षा वाढल्या आहेत.

सध्या मात्र सिक्वेलमध्ये अक्षय कुमार दिसणार असल्याची कोणतीही अधिकृत माहिती समोर आलेली नाही. त्यामुळे चाहत्यांना या कास्टिंगसाठी अधिकृत घोषणेची प्रतीक्षा करावी लागणार आहे.