Bhooth Bangla: बॉक्स ऑफिसवर ‘भूत बंगला’ची दहशत; 5 दिवसांत कमावले इतके कोटी

गेल्या महिनाभरापासून बॉक्स ऑफिसवर ‘धुरंधर : द रिव्हेंज’चा बोलबाला पहायला मिळतोय. महिनाभरानंतर 17 एप्रिल रोजी अक्षय कुमारचा ‘भूत बंगला’ हा हॉरर कॉमेडी चित्रपट प्रेक्षकांच्या भेटीला आला. ‘धुरंधर 2’च्या लाटेत हा चित्रपट चांगली कमाई करू शकेल का, असा प्रश्न उपस्थित केला जात होतं. परंतु प्रियदर्शन आणि अक्षयच्या जोडीने पुन्हा एकदा कमाल केली आहे. पेड प्रीव्ह्यूसह या चित्रपटाने 16 कोटी रुपयांनी बॉक्स ऑफिसवर ओपनिंग केली. आता प्रदर्शनाला पाच दिवस झाल्यानंतर चित्रपटाची कोट्यवधी रुपयांची कमाई सुरू आहे. या चित्रपटाचं दिग्दर्शन प्रियदर्शनने केलं आहे. या जोडीने याआधी ‘दे दना दन’, ‘खट्टा मीठा’, ‘गरम मसाला’, ‘भागम भाग’, ‘हेरा फेरी’, ‘भुल भुलैय्या’ यांसारख्या चित्रपटांसाठी एकत्र काम केलं होतं.

‘सॅकनिल्क’ने दिलेल्या माहितीनुसार, अक्षय कुमारच्या ‘भूत बंगला’ने पेड प्रीव्ह्यूद्वारे 3.75 कोटी रुपयांचा गल्ला जमवला होता. त्यानंतर प्रदर्शनाच्या पहिल्या दिवशी 12.25 कोटी रुपयांची कमाई झाली. रविवारपर्यंत या चित्रपटाने बॉक्स ऑफिसवर दमदार कमाई केली. मात्र सोमवारी कमाईत थोटी घट पहायला मिळाली. मंगळवारी या चित्रपटाचे एकूण 11,183 शोज होते, त्यातून 6.82 कोटी रुपयांची कमाई झाली. त्यामुळे आतापर्यंत या चित्रपटाने भारतात 71.57 कोटी रुपयांचा गल्ला जमवला आहे. हे नेट कलेक्शन असून भारतातील ग्रॉस कलेक्शनचा आकडा 85.38 कोटी रुपयांवर पोहोचला आहे.

भूत बंगलाची कमाई-

• पेड प्रीव्ह्यू- 3.75 कोटी रुपये
• पहिला दिवस- 12.25 कोटी रुपये
• दुसरा दिवस- 19 कोटी रुपये
• तिसरा दिवस- 23 कोटी रुपये
• चौथा दिवस- 6.75 कोटी रुपये
• पाचवा दिवस- 6.82 कोटी रुपये (आतापर्यंत)
• एकूण नेट इंडिया कलेक्शन- 71.57 कोटी रुपये

‘भूत बंगला’ने जगभरात 100 कोटी रुपयांचा टप्पा पार केला आहे. अक्षय कुमारच्या या चित्रपटाचा बजेट 120 कोटी रुपये आहे. लवकरच हा बजेट वसूल होण्याची शक्यता आहे. त्यानंतर जी कमाई होईल, ती नफ्यात मोजली जाईल. ‘भूत बंगला’ हा एक हॉरर कॉमेडी चित्रपट आहे. यामध्ये अक्षय कुमार, परेश रावल, जिशू सेनगुप्ता, राजपाल यादव, तब्बू आणि वामिका गब्बी यांच्या भूमिका आहेत.