कधी, कुठे पाहू शकाल ‘बिग बॉस 17’चा ग्रँड फिनाले? फोनवरही पाहू शकाल Live टेलीकास्ट
'बिग बॉस 17'चा ग्रँड फिनाले जवळ आल्यापासून विजेत्याच्या नावावरून विविध चर्चा रंगल्या आहेत. सध्या बिग बॉसच्या घरात पाचच स्पर्धक राहिले आहेत. या पाच जणांमध्ये विजेतेपदासाठी चुरस रंगणार आहे. सध्याच्या वोटिंग ट्रेंडनुसार विजेतेपदासाठी दोन नावं चर्चेत आहेत.
मुंबई : 25 जानेवारी 2024 | टेलिव्हिजनवरील सर्वांत लोकप्रिय आणि तितकाच वादग्रस्त रिॲलिटी शो ‘बिग बॉस 17’चा ग्रँड फिनाले अवघ्या काही दिवसांवर येऊन ठेपला आहे. सध्या बिग बॉसच्या घरात पाच स्पर्धक राहिले आहेत. अंकिता लोखंडे, अभिषेक कुमार, मुनव्वर फारुकी, मन्नारा चोप्रा आणि अरुण माशेट्टी या पाच स्पर्धकांमध्ये विजेतेपदासाठी चुरस रंगली आहे. या पाच जणांपैकी कोणता स्पर्धक विजेता ठरणार, हे जाणून घेण्यासाठी चाहते उत्सुक आहेत. या लोकप्रिय शोचा ग्रँड फिनाले कधी आणि कुठे पाहता येईल, विजेत्याला बक्षीसाची रक्कम किती मिळणार, याबद्दलची माहिती जाणून घेऊयात..
मोबाइल फोनवर कसं पाहू शकता लाइव्ह टेलीकास्ट?
येत्या 28 जानेवारी रोजी कलर्स टीव्हीवर ‘बिग बॉस 17’चा ग्रँड फिनाले पार पडणार आहे. रविवारी सूत्रसंचालक सलमान खान या शोच्या विजेत्याचं नाव घोषित करणार आहे. संध्याकाळी 6 वाजल्यापासून रात्री 12 वाजेपर्यंत म्हणजेच जवळपास सहा तासांचा हा ग्रँड फिनाले असेल. कलर्स टीव्हीशिवाय तुम्ही हा शो तुमच्या फोनवर ऑनलाइनसुद्धा पाहू शकता. यासाठी तुम्हाला तुमच्या स्मार्टफोनमध्ये जियो सिनेमाचा अॅप डाऊनलोड करावा लागेल. त्यावर तुम्ही ‘बिग बॉस 17’ लाइव्हवर क्लिक करून या सिझनचा ग्रँड फिनाले पाहू शकता. हा शो तुम्हाला मोफत लाइव्ह पाहता येणार आहे.
बक्षीसाची रक्कम
‘बिग बॉस 17’च्या विजेत्याला ट्रॉफीसोबत 50 लाख रुपये बक्षिसाची रक्कम मिळणार आहे. मात्र ही रक्कम अद्याप पूर्णपणे निश्चित करण्यात आली नाही. कारण प्रत्येकवेळी शोच्या ग्रँड फिनालेच्या आधी सुटकेसचा ट्विस्ट पहायला मिळतो. बिग बॉसच्या टॉप 5 स्पर्धकांना 10 लाख रुपये किंवा त्यापेक्षा अधिक रकमेची ऑफर दिली जाते. हे पैसे घेऊन त्या स्पर्धकाला माघार घेता येते. त्यामुळे मूळ बक्षिसाची रक्कम कमी होऊ शकते.
‘बिग बॉस 17’च्या विजेत्याला ट्रॉफी आणि जिंकलेल्या रकमेसोबतच आणखी एक खास भेटवस्तू मिळणार आहे. याबद्दलची माहिती करण जोहरने शोदरम्यान दिली होती. वीकेंड का वार एपिसोडमध्ये त्याने एका कारच्या ब्रँडचे सीईओ तरुण गर्ग यांचं स्वागत केलं होतं. त्यांनी स्पर्धकांचीही भेट घेतली होती. तरुण गर्ग यांनी शाहरुख खान आणि दीपिका पादुकोणला त्यांच्या कारचे ब्रँड अॅम्बेसिडर असल्याचं सांगत हुंडाई क्रेटाच्या लाँचची घोषणा केली होती. यासोबतच त्यांनी असंही सांगितलं की शोच्या विजेत्याला आलिशान कारसुद्धा भेट म्हणून मिळणार आहे.