Bharat Ganeshpure : उज्ज्वल निकम यांच्या ‘प्रहार’ सिनेमात दिसणार ‘चला हवा येऊ द्या’ मधील अभिनेता, प्रेक्षकांची उत्सुकता शिगेला

राजकुमार रावच्या बहुप्रतिक्षित कोर्टरूम ड्रामा ‘प्रहार: द अनटोल्ड स्टोरी ऑफ उज्ज्वल निकम’चा ट्रेलर प्रदर्शित झाला आहे. या चित्रपटात राजकुमार रावनं उज्ज्वल निकम यांची भूमिका साकारली आहे. चित्रपटाची कथा २६/११ मुंबई दहशतवादी हल्ल्याशी संबंधित कायदेशीर लढ्यांभोवती फिरते. हा चित्रपट १६ ऑक्टोबर रोजी चित्रपटगृहांमध्ये प्रदर्शित होईल. या सिनेमात सुप्रसिद्ध मराठी अभिनेता ललित प्रभाकरनं अजमल कसाबची भूमिका साकारली आहे. पण, तुम्हाला माहितीये का? ‘प्रहार‘ या सिनेमात ‘चला हवा येऊ द्या‘ फेम अभिनेत्याचीही वर्णी लागली आहे.

‘चला हवा येऊ द्या‘ फेम अभिनेत्याची वर्णी

‘प्रहार‘ या सिनेमाचा ट्रेलर प्रदर्शित झाला असून या ट्रेलरला प्रेक्षकांचा चांगला प्रतिसाद मिळतोय. ललितनं साकारलेल्या कसाबच्या भूमिकेचीही चर्चा होतेय. तसंच या सिनेमात ‘चला हवा येऊ द्या‘ फेम भारत गणेशपुरे यांचीही वर्णी लागली आहे. ‘प्रहार‘ सिनेमात भारत गणेशपुरे यांनी एका वकिलाची भूमिका साकारली आहे. मात्र, त्यांच्या भूमिकेचं नाव अद्याप समोर आलेलं नाही. भारत गणेशपुरे ‘प्रहार‘ सिनेमात झळकणार असल्यामुळे त्यांच्या चाहत्यांची उत्सुकता शिगेला पोहोचली आहे.

कसा आहे ‘प्रहार‘ सिनेमाचा ट्रेलर?

‘प्रहार’ या सिनेमाचा ट्रेलरही मनाला भिडतो. या सिनेमात २६/११ च्या भयानक रात्रीची एक झलक दाखवली आहे. ‘प्रहार ,सिनेमाचा ट्रेलर त्या भयानक दृश्याच्या एका झलकने सुरू होतो. २६ नोव्हेंबरच्या रात्री छत्रपती शिवाजी महाराज टर्मिनसवरील दहशतवादी हल्ल्यात आपल्या आईला गमावलेली एक निष्पाप मुलगी, न्यायालयात दहशतवादी कसाबविरुद्ध साक्ष देते. उज्ज्वल निकम यांची भूमिका साकारणारा राजकुमार राव, कसाबला फाशी देण्याचा निर्धार करतो. तो केवळ मुंबईचेच नव्हे, तर संपूर्ण भारताचं प्रतिनिधित्व करत आहे. ललितनंही कसाबची भूमिका उत्तमरित्या साकारली आहे.

दरम्यान, ‘प्रहार‘ या सिनेमात राजकुमार राव आणि ललित प्रभाकर यांच्यासोबत जयदीप अहलावत, वामिका गब्बी, सिकंदर खेर, आशिष विद्यार्थी यांच्याही मुख्य भूमिका आहेत.