हर हर महादेव चित्रपटावर राष्ट्रवादी कॉँग्रेस आणि मनसे एकमेकांना भिडले, पाहा कुठे काय घडलं

नाशिक : हर हर महादेव चित्रपटावरुन नाशिकमध्ये राष्ट्रवादी कॉँग्रेस आणि महाराष्ट्र नवनिर्माण सेना चांगलीच आक्रमक झाली आहे. नाशिकच्या सिटी सेंटर मॉल येथील चित्रपट गृहात हर हर महादेव हा चित्रपट दाखवू नये यासाठी राष्ट्रवादी कॉँग्रेस पक्ष नाशिकच्या वतिने निवेदन देण्यात आले आहे. असं असतांना तिथे महाराष्ट्र नवनिर्माण सेनेच्या वतिने हर हर महादेव चित्रपट दाखवावा यासाठी आग्रही मागणी करण्यात येत आहे. एकाच चित्रपट गृहाच्या ठिकाणी राष्ट्रवादी कॉँग्रेस पक्ष आणि महाराष्ट्र नवनिर्माण सेना एकाच ठिकाणी आल्याने तणावाचे वातावरण निर्माण झाले होते. संभाजीराजे छत्रपती यांनी या चित्रपटावर आक्षेप घेतल्यावर त्याला राष्ट्रवादी कॉँग्रेस पक्षाने पाठिंबा दर्शविला आहे. याशिवाय संभाजी ब्रिगेड या संघटनेने देखील पाठिंबा दिला असून ठिकठिकाणी हर हर महादेव चित्रपट बंद पाडला जात आहे. तर नाशिकमध्ये चित्रपटगृहाच्या चालक-मालक यांनी धास्ती घेतली असून हर हर महादेवचे शो बंद करण्यात आले आहे. नाशिकमध्ये याच कारणावरून राष्ट्रवादी कॉँग्रेस पार्टी आणि महाराष्ट्र नवनिर्माण सेना हे आमने-सामने आल्याचे पाहायला मिळाले.

नाशिक शहरातील सिटी सेंटर मॉल येथील चित्रपटगृहात हर हर महादेव चित्रपट सुरू करण्याबाबत महाराष्ट्र नवनिर्माण सेनेकडून आग्रही मागणी केली जात असून जो पर्यन्त शो सुरू होत नाही तोपर्यंत जाणार नाही अशी भूमिका घेतली आहे.

राष्ट्रवादी कॉँग्रेस पक्षाच्या वतिने हर हर महादेव चित्रपट दाखवू नये त्यामध्ये इतिहास चुकीच्या पद्धतीने दाखवला जात असून चित्रपट दाखवू नका अन्यथा निदर्शने केली जाईल असा इशारा दिला आहे.

नाशिकच्या चित्रपट गृहात कुठेही हर हर चित्रपट उपलब्ध नसून चित्रपटगृहाच्या मालक-चालक यांनी धास्ती घेतली आहे, राज्यातील वातावरण बघता खबरदारीचा उपाय म्हणून हे शो बंद ठेवल्याची माहिती आहे.

ठाणे येथील चित्रपट गृहात झालेला राडा बघता नाशिकमध्ये तणावाचे वातावरण निर्माण झाले होते, मात्र पोलीसांनी घटना स्थळी धाव घेत हे वातावरण शांत केले आहे.

हर हर चित्रपट गृहात राज ठाकरे यांनी व्हॉईस दिला असल्याने मनसेने यामध्ये उडी घेतली असून हर हर चित्रपट सुरू करण्याबाबत आग्रह केला जात आहे. या मागणीला मात्र राष्ट्रवादी कॉँग्रेसने विरोध दर्शविला आहे.