Danny Denzongpa : बॉलिवूड अभिनेत्यानं सुरू केलेला दारूचा व्यवसाय, 40 कोटी खर्च करून वाचवलं साम्राज्य, विजय मल्ल्याच्याही आणले नाकीनऊ

जेव्हा जेव्हा बॉलिवूडमधील खलनायकांचा उल्लेख होतो, तेव्हा सर्वात आधी डॅनी डेन्झोंग्पांचं नाव आठवतं. आपल्या दमदार आवाजानं पडद्यावर वर्चस्व निर्माण करणाऱ्या डॅनींची खरी कहाणी एखाद्या चित्रपटापेक्षा कमी नाही. त्यांनी चित्रपटांमध्ये बरीच प्रसिद्धी मिळवली, पण त्यांच्या उत्पन्नाचा खरा स्रोत अभिनय नसून दारूचा व्यवसाय होता. आपल्या मेहनतीनं त्यांनी एक अशी कंपनी उभी केली, जी आज देशातील सर्वात मोठ्या मद्यनिर्मिती कंपन्यांपैकी एक आहे. आज, चित्रपटांमध्ये एक भीतीदायक खलनायक म्हणून ओळखला जाणारा हा अभिनेता पडद्यामागे एक यशस्वी व्यावसायिक देखील आहे.

डॅनी डेन्झोंग्पांचा जन्म सिक्कीममध्ये झाला. लहानपणापासूनच भारतीय सैन्यात भरती होऊन देशाची सेवा करण्याचं त्यांचं स्वप्न होतं. पण १९६० च्या दशकात चीनसोबतच्या तणाव आणि युद्धादरम्यान त्यांनी इतका विध्वंस आणि हिंसाचार पाहिला की त्यांची आई घाबरली. त्यांनी डॅनी यांना सैन्यात भरती न होण्याचा आग्रह केला. आईचं ऐकून डॅनी यांनी आपला विचार बदलला. त्यानंतर त्यांना संगीतात रस निर्माण झाला आणि त्यांनी पुण्यातील फिल्म अँड टेलिव्हिजन इन्स्टिट्यूट ऑफ इंडिया (FTII) मध्ये अभिनयाचं शिक्षण घेतलं. येथूनच त्यांच्या चित्रपट कारकिर्दीची सुरुवात झाली. १९७० च्या दशकात, त्यांनी चित्रपटांमध्ये छोट्या भूमिका केल्या आणि हळूहळू ते बॉलिवूडमधील सर्वात भीतीदायक खलनायकांपैकी एक म्हणून नावारूपाला आले.

चित्रपटसृष्टीत यश मिळूनही, डॅनींचे आपल्या मूळ गावाशी, सिक्कीमशी असलेलं नातं अबाधित राहिलं. मुंबईच्या धावपळीपासून दूर, आपल्या कुटुंबासोबत आणि घरासोबत वेळ घालवण्याची त्यांना तीव्र इच्छा होती. त्यामुळे, त्यांनी वर्षातील किमान अर्धा काळ सिक्कीममध्ये घालवण्याचा निर्णय घेतला. येथूनच त्यांचा व्यावसायिक बनण्याचा प्रवास सुरू झाला. डॅनी यांनी १९८७ मध्ये ‘युक्सोम ब्रुअरीज’ सुरू केली, ज्याला सिक्कीममधील त्याच्या युक्सोम गावाचं नाव देण्यात आलं. सुरुवातीला, हा एक छोटा व्यवसाय होता, ज्याचा उद्देश स्थानिक लोकांना रोजगार देणं आणि सिक्कीमची अर्थव्यवस्था मजबूत करणं हा होता. मात्र, डॅनींचा हा छोटा व्यवसाय हळूहळू वाढत गेला. त्यांची कंपनी लवकरच देशातील तिसरी सर्वात मोठी आणि ईशान्य भारतातील सर्वात मोठी ब्रुअरी बनली.

विजय मल्ल्याला रोखण्यासाठी ४० कोटी रुपये खर्च केले

डॅनी यांनी २००५ मध्ये आपल्या व्यवसायाचा विस्तार करण्यास सुरुवात केली. त्याच वर्षी, त्यांनी ओडिशामध्ये डेन्झॉन्ग ब्रुअरीजची स्थापना केली. त्यानंतर, २००९ मध्ये, त्यांनी आसामस्थित रायनो एजन्सीज लिमिटेड ही कंपनी विकत घेतली. वृत्तानुसार, डॅनी यांनी या व्यवहारासाठी अंदाजे ४० कोटी रुपये खर्च केले. त्यावेळी, विजय मल्ल्याची कंपनी, युनायटेड ब्रुअरीज (UB), देखील ईशान्य भारतीय बाजारपेठेत प्रवेश करण्याची तयारी करत होती. डॅनी यांना माहित होतं की, जर युनायटेड ब्रुअरीजनं या बाजारपेठेत प्रवेश केला, तर त्यांच्या व्यवसायाला मोठं नुकसान होऊ शकते. त्यामुळे, बाजारपेठेतील आपलं स्थान मजबूत करण्यासाठी त्यांनी रायनो एजन्सीज विकत घेतली. एका बाजूला विजय मल्ल्याची मोठी कंपनी होती, तर दुसऱ्या बाजूला डॅनींचा स्थानिक व्यवसाय होता. पण, डॅनींच्या या रणनीतीमुळे त्यांना व्यावसायिक जगात एक वेगळी ओळख निर्माण करण्यास मदत झाली.

डॅनींनी एका मुलाखतीत आपल्या व्यवसायाच्या यशाबद्दल उघडपणे सांगितलं. २००९ मध्ये ‘द इंडियन एक्सप्रेस’ला दिलेल्या मुलाखतीत, त्यांचा ब्रुअरीचा व्यवसाय कसा चालला आहे असं विचारलं असता, ते म्हणाले की, ‘खूप चांगला. आता सिक्कीममध्ये माझ्या तीन ब्रुअरी आहेत. मुळात, हेच माझ्या उदरनिर्वाहाचं साधन आहे. अभिनय तर आपोआपच होतो.’

दरम्यान, डॅनी यांनी ‘धुंद’, ‘द बर्निंग ट्रेन’, ‘अग्निपथ’, ‘हम’, ‘क्रांतिवीर’ आणि ‘घातक’ यांसारख्या चित्रपटांमध्ये भूमिका साकारल्या. त्यांनी रजनीकांतच्या २०१० सालच्या ‘एंथिरन’ या चित्रपटात मुख्य खलनायकाची भूमिकाही साकारली होती. त्यांनी ‘बेबी’ आणि ‘नाम शबाना’ यांसारख्या चित्रपटांमध्येही महत्त्वाच्या भूमिका केल्या.