‘दिलवाले दुल्हनिया ले जाएंगे’मधून रिजेक्ट झालेलं गाणं, 4 वर्षानंतर शाहरुखच्या चित्रपटात वापरलं, ठरलं सुपरहिट

बॉलिवूडच्या इतिहासात 90 च्या दशकातील अनेक चित्रपट आणि गाणी आजही प्रेक्षकांच्या मनात घर करून आहेत. शाहरुख खान आणि काजोल यांची मुख्य भूमिका असलेला ‘दिलवाले दुल्हनिया ले जाएंगे’ हा त्यापैकीच एक लोकप्रिय चित्रपट. 1995 मध्ये प्रदर्शित झालेल्या या चित्रपटाने बॉक्स ऑफिसवर मोठे यश मिळवले. विशेष म्हणजे, या चित्रपटातील गाणीही प्रेक्षकांच्या पसंतीस उतरली. मात्र, या चित्रपटासाठी रेकॉर्ड केलेलं एक गाणं नंतर चित्रपटातून वगळण्यात आलं होतं. विशेष म्हणजे, चार वर्षांनंतर हेच गाणं शाहरुख खानच्या दुसऱ्या चित्रपटातून प्रदर्शित झालं आणि प्रचंड लोकप्रिय ठरलं.

हे गाणं म्हणजे ‘तुझे याद ना मेरी आई, किसी से अब क्या कहना’. 16 ऑक्टोबर 1998 रोजी प्रदर्शित झालेल्या करण जोहर दिग्दर्शित ‘कुछ कुछ होता है’ या चित्रपटातील हे गाणं आहे. या गाण्याला जतिन-ललित यांनी संगीत दिलं असून उदित नारायण, अलका याज्ञिक आणि मन्सूर यांनी ते गायलं आहे.

‘दिलवाले दुल्हनिया ले जाएंगे’साठी आधीच रेकॉर्ड झालं होतं गाणं

मिळालेल्या माहितीनुसार, ‘तुझे याद ना मेरी आई’ हे गाणं सुरुवातीला ‘दिलवाले दुल्हनिया ले जाएंगे’ या चित्रपटासाठी रेकॉर्ड करण्यात आलं होतं. मात्र, नंतर हे गाणं चित्रपटातून वगळण्यात आलं. संगीतकार ललित पंडित यांनी एका मुलाखतीत या गाण्याशी संबंधित आठवणी सांगितल्या होत्या.

जतिन-ललित यांनी हे गाणं निर्माता यश चोप्रा यांना ऐकवलं, तेव्हा तिथे उपस्थित असलेले गीतकार आनंद बक्षी भावुक झाले होते, असं सांगितलं जातं. गाण्याचे पंजाबी बोल आणि त्यातील भावनिक आशय यामुळे ते विशेष ठरलं होतं.

करण जोहर यांना गाणं आवडलं अन् ‘कुछ कुछ होता है’मध्ये मिळाली संधी

‘दिलवाले दुल्हनिया ले जाएंगे’मधून वगळण्यात आलेलं हे गाणं नंतर ‘कुछ कुछ होता है’साठी वापरण्यात आलं. चित्रपटातील भावनिक प्रसंगासाठी हे गाणं योग्य ठरेल असं पामेला चोप्रा यांनी करण जोहर यांना सुचवल्याचं या वृत्तात नमूद करण्यात आलं आहे. गाणं ऐकल्यानंतर करण जोहर यांना ते आवडलं आणि त्याचा चित्रपटात समावेश करण्यात आला.