90 च्या दशकात छतावर स्पीकर लावून वाजवलं जायचं ‘हे’ गाणं, 33 वर्षांनंतरही गाण्याची प्रचंड क्रेझ, ऐकताच…

jaadu teri nazar

हिंदी चित्रपटसृष्टीतील ‘किंग ऑफ रोमान्स’ म्हणून अभिनेता शाहरुख खानची ओळख आहे. गेल्या साडेतीन दशकांपासून आपल्या अभिनयाने त्याने बॉलिवूडवर अधिराज्य गाजवलं आहे. त्याच्या चित्रपटांमधील गाणीही प्रेक्षकांच्या मनात कायमची घर करून राहिली आहेत. 90च्या दशकातील असंच एक गाणं आजही प्रेक्षकांच्या आवडीचं आहे, जे त्या काळात लोक गच्चीवर स्पीकर लावून मोठ्या आवाजात ऐकायचे. हे गाणं म्हणजे ‘जादू तेरी नजर’.

आजच्या डिजिटल युगात गाणी ऑनलाइन म्युझिक अॅप्सवर ऐकली जातात. मात्र, एक काळ असा होता, जेव्हा टेप रेकॉर्डर आणि वॉकमनवर गाणी ऐकण्याची क्रेझ होती. शाहरुख खानचं ‘जादू तेरी नजर’ हे गाणं याच जुन्या आठवणींशी जोडलेलं आहे.

1993 मध्ये प्रदर्शित झालेल्या ‘डर’ या चित्रपटातील हे गाणं आहे. यश चोप्रा यांच्या दिग्दर्शनाखाली तयार झालेला हा चित्रपट त्या वर्षातील गाजलेल्या बॉलिवूड चित्रपटांपैकी एक होता. या चित्रपटातील ‘जादू तेरी नजर’ या गाण्याने विशेष लोकप्रियता मिळवली.

उदित नारायण यांच्या आवाजाने गाण्याला मिळाली खास ओळख

‘जादू तेरी नजर’ हे गाणं प्रसिद्ध गायक उदित नारायण यांनी गायलं आहे. रिलीजच्या अनेक वर्षांनंतरही या गाण्याची लोकप्रियता कायम आहे. या रोमँटिक गाण्याचं चित्रीकरण अभिनेत्री जूही चावला यांच्यावर करण्यात आलं होतं.

चित्रपटातील एका प्रसंगात जूही चावला कॉलेजमध्ये असताना पार्श्वभूमीवर शाहरुख खान त्यांच्यासाठी हे गाणं गाताना दिसतो. गाण्याची चाल, शब्द आणि उदित नारायण यांचा आवाज यामुळे ते प्रेक्षकांच्या पसंतीस उतरलं. या गाण्याला शिव-हरी या संगीतकार जोडीने संगीत दिलं होतं तर गीतकार आनंद बक्षी यांनी त्याचे बोल लिहिले होते.

‘डर’मध्ये शाहरुख खानने साकारला होता नकारात्मक रोल

‘डर’ या चित्रपटात शाहरुख खान आणि जूही चावला यांच्यासोबत अभिनेता सनी देओल यांनीही महत्त्वाची भूमिका साकारली होती. या चित्रपटात शाहरुख खानने नकारात्मक व्यक्तिरेखा साकारली होती.

एंटी-हिरोच्या भूमिकेत दिसलेल्या शाहरुख खानने आपल्या अभिनयाची वेगळी छाप पाडली. या भूमिकेमुळे त्याच्या अभिनयातील विविधता प्रेक्षकांसमोर आली. ‘जादू तेरी नजर’ हे गाणं आजही 90च्या दशकातील रोमँटिक संगीताच्या आठवणी जागवणारं गाणं म्हणून रसिकांच्या पसंतीस उतरलं आहे.