बॉलिवूडमध्ये आपल्या कामाने, अभिनयाने छाप पाडणारी कंगना रनौत बेधडक वक्तव्यांसाठी प्रसिद्ध आहे. बॉलिवीडची ही क्वीन आता आपल्या राजकीय कारकिर्दीला सुरुवात करणार आहे. २०२४ च्या लोकसभा निवडणुकीत हिमाचल प्रदेशातील मंडी मतदारसंघातून भाजपने कंगनाला तिकीट दिले आहे. कंगनाचा राजकारणातील प्रवेश हे फार मोठे आश्चर्य नाही. तिने अनेकदा आपले राजकीय विचार मांडले आहेत. गेल्या वर्षी नोव्हेंबरमध्येच तिने राजकारणात येण्याचे संकेत दिले होते. आपल्या दमदार अभिनयाने प्रेक्षकांच्या मनावर अमिट छाप सोडणाऱ्या कंगना ही बॉलिवूडची क्वीन म्हणूनही ओळखले जाते.
कंगनाने 2006 मध्ये अनुराग बासूच्या ‘गँगस्टर’ या चित्रपटातून बॉलिवूडमध्ये प्रवेश केला. इतक्या वर्षांच्या कारकिर्दीत तिने लम्हे, फॅशन, राज 2, वन्स अपॉन अ टाइम इन मुंबई, क्वीन, तनु वेड्स मनू, मणिकर्णिका आणि पंगा यांसारखे अनेक प्रसिद्ध चित्रपट केले आहेत. राजकीय जगतात प्रवेश करणारी बॉलिवूड अभिनेत्री कंगना रानौत किती श्रीमंत आहे हे जाणून घेऊया.
देशातल्या परिस्थितीवर, राजकारणावर खुलेपणाने विचार मांडणाऱ्या कंगना रानौतचा जन्म 23 मार्च 1987 रोजी हिमाचलच्या मंडी जिल्ह्यात झाला. तिची आई शाळेत शिक्षिका असून वडील व्यापारी आहेत. तिचं कुटुंब पूर्वीपासून राजकारणाशी जोडले गेले आहे. तिचे आजोबा सरजू सिंह राणौत आमदार होते. मात्र, त्यानंतर कोणीही राजकारणात सक्रिय नव्हते. कंगनाने चंदिगडमधून शिक्षण घेतले. कंगनाने डॉक्टर व्हावे अशी कुटुंबीयांची इच्छा होती, पण कंगनाने AIPMT (आता NEET) परीक्षा दिली नाही.
बॉलीवूडमध्ये एंट्री
कंगनाला आयुष्यात काही वेगळं, भव्यदिव्य करायचं होतं. त्यामुळे वयाच्या 16 व्या वर्षीच ती घरातून पळून काम केले. सुरूवातीला तिला खूप स्ट्रगल करावं लागलं, पण तिचा दमदार अभिनय आणि तिची प्रतिभा याच्या जोरावार तिने अथक मेहनत करून यश मिळवलं. आणि कोणीही गॉडफादर नसताना बॉलिवूडमध्ये तिने स्वत:ची एक वेगळी ओळख निर्माण केली. आज ती एका चित्रपटासाठी इतर अनेक नामवंत अभिनेत्रींपेक्षा जास्त फी आकारते.
किती श्रीमंत आहे कंगना ?
मीडिया रिपोर्ट्सनुसार, कंगनाची एकूण संपत्ती 95 कोटी रुपये आहे. कंगना एका चित्रपटासाठी 15 ते 25 कोटी रुपये मानधन घेते, त्यामुळे तिची गणना बॉलिवूडमधील महागड्या अभिनेत्रींमध्ये केली जाते. नुकत्याच आलेल्या थलायवी या चित्रपटासाठी तिने 24 कोटी रुपये घेतले होते. चित्रपटांव्यतिरिक्त कंगना रणौत अनेक ब्रँड्सशीही जोडलेली आहे. ती एका जाहिरातीसाठी 3 ते 3.5 कोटी रुपये घेते. याशिवाय ती एक दिग्दर्शक आणि निर्मातीदेखील आहे, ज्यामुळेही तिचे उत्पन्न वाढले आहे.
हिमाचल प्रदेशातील मनाली येथे कंगानाचा आलिशान बंगला आहे, ज्याची किंमत जवळपास 25 कोटी रुपये आहे. याशिवाय तिचा मुंबईत पाच बेडरूमचा एक फ्लॅट आहे, ज्याची किंमत अंदाजे 15 ते 20 कोटी रुपये आहे. याशिवाय पाली हिलमध्ये एक मोठे ऑफीस असून, त्याची किंमत अंदाजे 40 कोटी रुपये आहे.
कार कलेक्शन
कंगना राणौतही लक्झरी कारचीही शौकीन आहे. तिच्याकडे BMW 7-Series, Mercedes Benz GLE SUV, Audi Q3 आणि Mercedes Maybach S-Class सारख्या लक्झरी कार आहेत.