आजच्या कॉर्पोरेट कर्मचाऱ्यांची व्यथा सांगणारं 55 वर्षांपूर्वीचं गाणं, किशोर कुमारांच्या आवाजाने आजही प्रचंड सुपरहिट

Kishore Kumar

हिंदी सिनेमातील काही गाणी काळाच्या पुढे जाऊन प्रेक्षकांच्या आयुष्याचा भाग बनतात. असचं एक 1971 मध्ये प्रदर्शित झालेल्या ‘हाथी मेरे साथी’ या चित्रपटातील ‘दुनिया में रहना है तो काम कर प्यारे’ हे गाणंही त्यापैकीच एक आहे. आजच्या धकाधकीच्या कॉर्पोरेट जीवनाशीही या गाण्याचे बोल सहज जोडले जातात. काम, मेहनत आणि आत्मसन्मानाचा संदेश देणारं हे गाणं आजही तितकंच लोकप्रिय आहे.

राजेश खन्ना यांच्यावर चित्रित झालेल्या या गाण्याला किशोर कुमार यांनी आवाज दिला असून आनंद बक्षी यांनी गीत लिहिलं आहे. तर लक्ष्मीकांत-प्यारेलाल यांच्या संगीताने गाण्याला खास रंगत दिली. ‘दुनिया में रहना है तो काम कर प्यारे, हाथ जोड़ सबको सलाम कर प्यारे’ हे गाण्याचे बोल आजही अनेकांना प्रेरणा देतात.

चित्रपट ठरला होता सुपरहिट

‘हाथी मेरे साथी’ची कथा अनाथ राजू आणि त्याच्या चार हत्तींसोबतच्या घट्ट नात्यावर आधारित आहे. राजेश खन्ना यांनी राजूची भूमिका साकारली होती, तर तनुजा यांनी तनुची भूमिका केली होती. चित्रपटाचे दिग्दर्शन एम.ए. थिरुमुगम यांनी केले होते. या चित्रपटाच्या पटकथेवर सलीम-जावेद यांनी काम केले होते.

चित्रपटाच्या कथेसोबतच त्यातील गाणीही प्रचंड गाजली. 1971 मध्ये ‘हाथी मेरे साथी’ मोठा हिट ठरला आणि त्याने बॉक्स ऑफिसवर विक्रम नोंदवल्याचे सांगितले जाते. चित्रपटातील गाणी लोकप्रिय झाल्यामुळे त्याचा संगीत अल्बमही विशेष गाजला.

आजही या गाण्याची जादू कायम

या चित्रपटाशी संबंधित एक रंजक किस्साही सांगितला जातो. अनेक वर्षांनंतर तनुजा आपल्या मुलगी काजोलसोबत सर्कसला गेल्या असताना चित्रपटातील एका हत्तीने त्यांना ओळखल्याचे म्हटले जाते. या आठवणीमुळे ‘हाथी मेरे साथी’च्या आठवणी पुन्हा ताज्या झाल्या.

आज 55 वर्षांनंतरही ‘दुनिया में रहना है तो काम कर प्यारे’ हे गाणं केवळ मनोरंजनापुरतं मर्यादित राहिलेलं नाही. मेहनत, प्रामाणिकपणा आणि स्वाभिमानाचा संदेश देणारे त्याचे शब्द आजच्या नोकरदार वर्गालाही आपलेसे वाटतात. त्यामुळेच राजेश खन्ना आणि किशोर कुमार यांच्या या गाण्याची जादू आजही कायम असल्याचं पाहायला मिळतं.