देऊळ बंद 2मधून चाहत्यांना मोठं सरप्राईज, थेट प्रविण तरडेंची बायको महत्त्वाच्या भूमिकेत

मराठी चित्रपटसृष्टीत सध्या चर्चेत असलेला बहुप्रतिक्षित चित्रपट ‘देऊळ बंद 2’ लवकरच प्रेक्षकांच्या भेटीला येणार आहे. या चित्रपटाच्या प्रदर्शनाची तारीख 21 मे 2026 जाहीर झाल्यानंतर स्वामीभक्त आणि चित्रपटप्रेमींमध्ये प्रचंड उत्साहाचे वातावरण निर्माण झाले आहे. त्यातच आता चित्रपटाचे पहिले पोस्टर प्रदर्शित झाल्यामुळे प्रेक्षकांची उत्सुकता आणखी वाढली आहे.

‘देऊळ बंद 2’ च्या पहिल्या पोस्टरमध्ये एक वेगळाच भावनिक आणि आध्यात्मिक पैलू पाहायला मिळतो. पोस्टरमध्ये स्वामी समर्थ प्रसन्न मुद्रेत हात वर करून आशीर्वाद देताना दिसत आहेत. ते दुचाकीवर मागे बसलेले असून, अभिनेत्री स्नेहल तरडे दुचाकी चालवत आहे.

विशेष म्हणजे, स्वामींच्या चेहऱ्यावर शांतता आणि प्रसन्नता दिसत असताना स्नेहल तरडेच्या चेहऱ्यावर राग आणि डोळ्यांत अश्रू दिसत आहेत. या विरोधाभासामुळे कथा नेमकी कशावर आधारित आहे याबाबत प्रेक्षकांमध्ये उत्सुकता निर्माण झाली आहे.

पुन्हा एकदा मोहन जोशी ‘स्वामी’ रूपात

पहिल्या भागात आपल्या प्रभावी अभिनयाने प्रेक्षकांची मनं जिंकणारे मोहन जोशी पुन्हा एकदा स्वामी समर्थांच्या भूमिकेत दिसणार आहेत. त्यांच्या दमदार आवाज आणि अभिनयामुळे प्रेक्षकांना स्वामी प्रत्यक्ष समोर असल्याचा भास होतो आणि हाच अनुभव या दुसऱ्या भागातही मिळणार आहे.

पहिल्या भागात स्वामींचा प्रवास आलिशान गाडीतून दाखवण्यात आला होता तर या भागात ते एका सामान्य महिलेच्या दुचाकीवरून प्रवास करताना दिसतात. यामधून भक्त कितीही संकटात असला तरी स्वामी त्याच्या पाठीशी असतात हा संदेश अधोरेखित केला जातो. या वेळी कथा एका सामान्य कुटुंबाभोवती फिरताना दिसणार असून, स्वामीकृपेने त्यांच्या आयुष्यात घडणारे बदल दाखवले जाणार आहेत.

दिग्दर्शन आणि निर्मिती

या चित्रपटाची कथा, पटकथा, संवाद आणि दिग्दर्शन अष्टपैलू कलाकार प्रवीण तरडे यांनी केले आहे. त्यांच्या प्रभावी मांडणीमुळे या चित्रपटाकडून प्रेक्षकांना मोठ्या अपेक्षा आहेत. चित्रपटाची निर्मिती कैलाश वाणी, जयश्री कैलाश वाणी, कैवल्य वाणी आणि जुईली वाणी-सूर्यवंशी यांनी केली असून, Vatvruksha Entertainment या बॅनरखाली हा चित्रपट साकारला गेला आहे.

देऊळ बंद 2 च्या पोस्टरनेच चित्रपटाची झलक देत प्रेक्षकांमध्ये उत्सुकता शिगेला पोहोचवली आहे. आध्यात्मिकता, भावनिकता आणि वास्तववादी कथा यांचा संगम असलेला हा चित्रपट 21 मे 2026 रोजी प्रदर्शित होत असून तो बॉक्स ऑफिसवर कशी कामगिरी करतो याकडे सर्वांचे लक्ष लागले आहे.