Oscars 2021 | नोमॅडलँडसाठी Chloe Zhao यांना सर्वोत्कृष्ट दिग्दर्शनाचा ऑस्कर, इतिहासातील दुसरीच महिला दिग्दर्शक

नोमॅडलँड चित्रपटाने सर्वोत्कृष्ट चित्रपट, दिग्दर्शन आणि अभिनेत्री या तीन मुख्य पुरस्कारांसह सोहळ्यात बाजी मारली. (Oscars 2021 Nomadland Best Picture)

Oscars 2021 Nomadland Best Picture

Anish Bendre | Updated on: Apr 26, 2021 | 9:06 AM

लॉस अँजेलस : जगभराचे लक्ष लागून राहिलेले अकॅडमी अवॉर्ड्स अर्थात ‘ऑस्कर’ 2021 (Oscars Awards 2021) यांची घोषणा करण्यात आली. च्लोए झाओ (Chloe Zhao) यांना नोमाडलँड (Nomadland) चित्रपटासाठी सर्वोत्कृष्ट दिग्दर्शनाचा ऑस्कर मिळाला. ‘ऑस्कर’च्या 93 वर्षांच्या इतिहासात हा पुरस्कार पटकावणाऱ्या त्या दुसऱ्याच महिला दिग्दर्शक ठरल्या आहेत. नोमॅडलँड हाच सर्वोत्कृष्ट चित्रपटही ठरला. तर अभिनेत्री फ्रान्सेस मॅकडॉर्मंड (Frances McDormand) यांना नोमॅडलँडमधील फर्नच्या भूमिकेसाठी सर्वोत्कृष्ट अभिनेत्रीसाठी ऑस्कर मिळाला. दरवर्षीच्या परंपरेला छेद देत सर्वोत्कृष्ट चित्रपटाऐवजी सर्वोत्कृष्ट अभिनेता या पुरस्काराची अखेरीस घोषणा करण्यात आली. अँथनी हॉपकिन्स (Anthony Hopkins) यांनी मँक सिनेमातील भूमिकेसाठी हा पुरस्कार पटकावला. (Oscars 2021 Nomadland wins Best Picture Chloe Zhao Best Director at 93rd Academy Awards)

लॉस अँजेलसमधील युनियन स्टेशन आणि डॉल्बी थिएटर या दोन स्थळांवर ऑस्कर पुरस्कार सोहळा आयोजित करण्यात आला होता. 2001 पासून डॉल्बी थिएटर हे ऑस्कर पुरस्कार वितरण सोहळ्यासाठी निश्चित झालेले स्थळ आहे. कोविड19 प्रादुर्भाव असूनही अकॅडमीने व्हर्चुअल कार्यक्रम न घेण्याचा निर्णय घेतला.

सर्वोत्कृष्ट चित्रपट विभागात द फादर, जुडास अँड द ब्लॅक मसिहा, मॅंक, मिनारी, नोमॅडलँड, प्रॉमिसिंग यंग वूमन, साऊंड ऑफ मेटल, द ट्रायल ऑफ द शिकागो या 7 चित्रपटांना नामांकनं मिळाली होती. तर मॅंक 10 नामांकनांसह अग्रेसर होता. तर द फादर, जुडास अँड द ब्लॅक मसिहा, मिनारी, नोमॅडलँड, साऊंड ऑफ मेटल आणि द ट्रायल ऑफ द शिकागो यांना प्रत्येकी सहा नामांकने होती. मात्र नोमॅडलँड चित्रपटाने तीन मुख्य पुरस्कारांसह सोहळ्यात बाजी मारली.