Pratyusha Banerjee : बालिका वधूमधील ‘नंदिनी’ने जग सोडण्यामागे बॉयफ्रेंडचा हात? प्रत्युषा बॅनर्जी केसमध्ये कोर्टाचा सर्वात मोठा निकाल!

मुंबई उच्च न्यायालयानं बुधवारी अभिनेत्री प्रत्युषा बॅनर्जी आत्महत्या प्रकरणातील आरोपी राहुल राज सिंग याला निर्दोष मुक्त करून मोठा दिलासा दिला. प्रत्युषाला आत्महत्येसाठी प्रवृत्त केल्याचा आरोप राहुलवर होता. ‘बालिका वधू’ या मालिकेतील आनंदीच्या भूमिकेमुळे प्रत्युषा घराघरात पोहोचली होती.

न्यायमूर्ती शिवकुमार दिगे यांच्या खंडपीठानं १ एप्रिल २०१६ रोजी गळफास घेण्यापूर्वी प्रत्युषा आणि राहुल यांच्यातील शेवटचं संभाषण महत्त्वपूर्ण पुरावा मानलं. या संभाषणाच्या आधारे, न्यायालयाने जवळपास 10 वर्षांपूर्वीच्या या प्रकरणात राहुलला सर्व आरोपांतून निर्दोष मुक्त केलं आहे.

१० वर्षांनंतर मोठा निर्णय

२४ वर्षीय प्रत्युषा तिच्या फ्लॅटमध्ये मृतावस्थेत आढळली होती. त्यावेळी ती तिचा अभिनेता-निर्माता राहुल राज सिंग याच्यासोबत रिलेशनशिपमध्ये होती. आत्महत्येनंतर राहुलनं प्रत्युषाला रुग्णालयात नेलं. मात्र, डॉक्टरांनी तिला मृत घोषित केलं.

प्रत्युषाच्या आईवडिलांनी राहुलविरोधात पोलिसांत तक्रार दाखल केली होती. त्यांनी आरोप केला होता की, राहुलने प्रत्युषाचा शारीरिक, मानसिक आणि आर्थिक छळ केला आणि त्याच्या छळामुळेच अभिनेत्रीनं आत्महत्या केली. यानंतर, राहुलविरोधात आत्महत्येसाठी प्रवृत्त करणे, हल्ला करणे आणि गुन्हेगारी धमकी देणे या कलमांखाली एफआयआर दाखल करण्यात आला.

यापूर्वी, दिंडोशी सत्र न्यायालयानं राहुलची दोषमुक्तीची याचिका फेटाळली होती आणि त्याच्यावर आरोप निश्चित केले जाणार होते. सत्र न्यायालयानं म्हटलं होतं की, या प्रकरणात मानवी वर्तन आणि मानसिक स्थितीचं सखोल विश्लेषण करणं आवश्यक आहे.

राहुलचे प्रतिनिधित्व करणारे वकील, आबाद पोंडा आणि श्रेयांश मिठार यांनी युक्तिवाद केला की, राहुलचे प्रत्युषासोबतचे शेवटचे संभाषण स्पष्टपणे दर्शवतं की, तो तिला आत्महत्या करण्यापासून थांबवण्याचा प्रयत्न करत होता. त्यानं म्हटलं होतं की, तो आपली गाडी वळवून तिला भेटायला येत आहे. पण, हे आपलं शेवटचं बोलणं असेल, असं प्रत्युषा म्हणालेली. दरम्यान, प्रत्युषानं तिच्या आईवडिलांसह सर्वांना दोष दिला. प्रत्युषा आणि राहुल लिव्ह-इन रिलेशनशिपमध्ये राहत होते. या शेवटच्या संभाषणाच्या आधारावर, मुंबई उच्च न्यायालयानं २०१६ मध्ये राहुलला अटकपूर्व जामीन मंजूर केला.