Salman Khan: 5 वर्षे बाबांशी बोलणं बंद..; आईवडिलांच्या लग्नाबद्दल सलमान खानचा खुलासा, आजोबांचा होता विरोध

सलमान खान, सलीम खान

Salman Khan: Salman Khan: बॉलिवूडचा सुपरस्टार सलमान खान त्याच्या चित्रपटांमुळे आणि ‘बिग बॉस 20’ या रिअॅलिटी शोमुळे सतत चर्चेत असतो. मात्र, यावेळी त्याने शोमध्ये स्वतःच्या कुटुंबाविषयी सांगितलेल्या एका जुन्या आठवणीने प्रेक्षकांचं लक्ष वेधून घेतलं आहे. सलमानचे वडील आणि प्रसिद्ध पटकथालेखक सलीम खान आणि आई सलमा खान यांच्या लग्नाला सलमानच्या आजोबांचा विरोध होता. एवढंच नव्हे, तर त्यांनी सलीम खान यांच्याशी तब्बल पाच वर्षे बोलणंही बंद केलं होतं. या विरोधामागचं कारण सांगताना सलमानने हा वाद धार्मिक नसून चित्रपटसृष्टीतील वातावरणाबद्दलच्या चिंतेतून निर्माण झाल्याचं स्पष्ट केलं.

‘बिग बॉस 20’च्या ‘वीकेंड का वार’ भागात सलमान खान स्पर्धकांशी संवाद साधत असताना त्याने त्याच्या आयुष्यातील हा प्रसंग सांगितला. सलमानची आई सलमा खान यांचं माहेरचं नाव सुशीला चरक होतं. सलीम खान यांच्याशी लग्न करण्याचा त्यांनी निर्णय घेतला, तेव्हा सलीम चित्रपटसृष्टीत स्वतःचं स्थान निर्माण करण्याचा प्रयत्न करत होते. त्यावेळी सलमानच्या आजोबांना म्हणजेच सलमा यांच्या वडिलांना आपल्या मुलीने चित्रपटसृष्टीशी संबंधित व्यक्तीशी लग्न करणं मान्य नव्हतं.

सलमानने सांगितलं की, या विरोधामागे धर्माचा कोणताही मुद्दा नव्हता. सलीम खान हे दिसायला देखणे होते आणि अभिनेता होण्याचं स्वप्न पाहत होते. मात्र, चित्रपटसृष्टीतील वातावरणात आपल्या मुलीला कसं राहावं लागेल, याची चिंता आजोबांना सतावत होती. त्यामुळे त्यांनी या लग्नाला विरोध केला. सलमाच्या भावंडांना मात्र सलीम खान यांच्याशी तिच्या लग्नाबाबत आक्षेप नव्हता.

पहा व्हिडीओ-

सलमानने पुढे सांगितलं, लग्नानंतर त्याच्या आजोबांनी सलीम खान यांच्याशी तब्बल पाच वर्षे संवाद साधला नव्हता. या कौटुंबिक नाराजीचा परिणाम नात्यांवर झाला. मात्र कालांतराने आजोबांच्या मनातील राग कमी झाला आणि त्यांना आपल्या निर्णयाचा पश्चात्तापही झाला. सलमानने आणखी एक आठवण सांगितली. आई-वडिलांमध्ये भांडण झाल्यानंतर सलमा खान रागाने माहेरी गेल्या होत्या. त्यावेळी आजोबांनी त्यांना माहेरी येण्यास मनाई केली नाही; मात्र भांडण झालं तरी पुन्हा माहेरी येऊन थांबण्याऐवजी पतीकडे परत जाण्याचा सल्ला दिला होता.

सलमानचा धाकटा भाऊ सोहैल खानच्या जन्मानंतर या नात्यातील दुरावा कमी झाला. सलमानने सांगितलं की, त्याचे आजोबा माहिमहून वांद्र्याला मिठाईचा डबा घेऊन आले होते. त्यावेळी त्यांनी आपल्या नातवंडांना मोठं होताना पाहण्याची संधी गमावल्याची खंत व्यक्त केली. नाराजीमुळे कुटुंबापासून दूर राहणं ही मोठी चूक होती, याची त्यांना जाणीव झाली होती.