श्रीदेवी-अनिल कपूरचं सर्वात रोमँटिक गाणं, आजही अनेकांचं आवडतं, ऐकू येताच चाहते..

सोशल मीडिया आणि रिमिक्सच्या युगापूर्वी हिंदी चित्रपटसृष्टीतील काही गाणी आपल्या सुरांनी आणि आठवणींनी प्रेक्षकांच्या मनावर कायमची कोरली गेली. 1987 मध्ये प्रदर्शित झालेल्या ‘मिस्टर इंडिया’ चित्रपटातील ‘काटे नहीं कटते’ हे त्यापैकीच एक अजरामर गाणे. या गाण्याच्या रेकॉर्डिंगदरम्यानचा ज्येष्ठ गायिका अलीशा चिनॉय यांचा अनुभव विशेष चर्चेत आला आहे. गायक किशोर कुमार यांच्यासोबत गाण्याची संधी मिळणे, ही त्यांच्या सुरुवातीच्या कारकिर्दीतील एक महत्त्वाची आठवण ठरली.

बोनी कपूर निर्मित आणि शेखर कपूर दिग्दर्शित ‘मिस्टर इंडिया’ या चित्रपटात अनिल कपूर आणि श्रीदेवी यांच्या प्रमुख भूमिका होत्या. या चित्रपटातील ‘काटे नहीं कटते’ हे गाणे श्रीदेवी यांच्या मोहक अभिनयामुळे आणि किशोर कुमार व अलीशा चिनॉय यांच्या सुरेल आवाजामुळे विशेष लोकप्रिय झाले.

अलीशा चिनॉय यांच्या आठवणीनुसार, बप्पी लाहिरी यांच्यासोबत हिट गाणे दिल्यानंतर त्यांना शेखर कपूर यांच्या कार्यालयातून फोन आला. गाण्यासाठी स्टुडिओत पोहोचल्यानंतर त्यांना हे किशोर कुमार यांच्यासोबतचे युगलगीत असल्याचे समजले. त्या वेळी तरुण असलेल्या अलीशा यांना एवढ्या मोठ्या गायकासोबत गाण्याची संधी मिळाल्याने आनंदासोबतच प्रचंड दडपणही आले होते.

किशोरदांची मस्ती आणि अलीशा यांचा अनुभव

रेकॉर्डिंग स्टुडिओमध्ये किशोर कुमार नेहमीप्रमाणे मस्तीच्या मूडमध्ये होते. लक्ष्मीकांत यांनी अलीशा यांची त्यांच्याशी ओळख करून दिली. मात्र, किशोरदांनी फारसे बोलणे न करता आपले काम सुरू ठेवले. अलीशा यांनी गंमतीने आठवण सांगितली की, त्यांच्या चेहऱ्यावरील हावभाव पाहून जणू ते ‘ही काय गाणार?’ असा विचार करत असावेत, असे त्यांना वाटले.

किशोर कुमार रेकॉर्डिंगपूर्वी विनोद करत होते आणि सहजपणे वावरत होते, तर अलीशा मात्र गाण्यावर लक्ष केंद्रित करण्याचा प्रयत्न करत होत्या. दोघांमध्ये फारसा संवाद झाला नाही; मात्र स्टुडिओतील वातावरण आणि संगीताची ऊर्जा त्यांच्यासाठी अविस्मरणीय ठरली.

‘काटे नहीं कटते’ ठरले अजरामर

या रेकॉर्डिंगनंतर किशोर कुमार स्टुडिओतून निघून गेले. त्यांच्यासोबत फारशी ओळख किंवा संवाद झाला नसला, तरी त्यांच्या आवाजासोबत गाण्याची संधी मिळाल्याचा आनंद अलीशा यांच्या मनात कायम राहिला.

श्रीदेवी यांची मनमोहक अदाकारी, अनिल कपूर यांची उपस्थिती आणि किशोर कुमार-अलीशा चिनॉय यांची सुरेल जुगलबंदी यामुळे ‘काटे नहीं कटते’ हे गाणे आजही हिंदी चित्रपटसृष्टीतील लोकप्रिय क्लासिक गाण्यांपैकी एक मानले जाते.