तब्बल 36 मिनिटांचं मराठी गाणं, केसांपासून नखापर्यंत प्रेयसीचं वर्णन; खरं प्रेम करणारे ऐकतच राहतील
२०१० मध्ये तब्बल ३६ मिनिटांचे एक लांबसडक गाणे तयार करण्याचा अनोखा प्रयोग मराठीमध्ये झाला आहे. यात कवितपासून गाणं बनवलं गेलं होतं. या सगळ्या कविता प्रेयसीचे अतिशय सुंदर वर्णन करणाऱ्या होत्या. कोणतं आहे हे गाणं, चला तर मग जाणून घेऊयात.
मराठी संगीत विश्वात मिलिंद इंगळे हे नाव खूप मोठं आहे. १९९८ मध्ये आलेला त्यांचा गारवा हा अल्बम पब्लिकला खूप भावला होता. या अल्बममधली गाणी आजही पावसात तितक्याच आवडीने ऐकली जातात. पण मिलिंद इंगळे यांच्या नावावर आणखी एक भारी रेकॉर्ड आहे. २०१० मध्ये त्यांनी असा एक प्रयोग केला जो ऐकून आजही लोक थक्क होतात. त्यांनी चक्क ३६ मिनिटांचे एकच सलग गाणे तयार केले होते. तुझ्या टपोऱ्या डोळ्यात माझा इवलासा गाव असे या महाकाय गाण्याचे नाव आहे.
हे गाणे म्हणजे खऱ्या प्रेमात पडलेल्या लोकांसाठी एक मोठी पर्वणी आहे. ज्ञानेश वाकुडकर यांच्या कवितांना मिलिंद इंगळे यांनी एका सलग गाण्यात गुंफले आहे. या गाण्यात प्रेयसीचे केसांपासून ते नखापर्यंत अतिशय सुंदर वर्णन केले आहे. प्रेमात आकंठ बुडालेला प्रियकर आपल्या भावना या गाण्यातून अगदी मोकळेपणाने मांडतो.
हे गाणे ऐकताना माणूस एका वेगळ्याच दुनियेत जातो.
अतिशय संथ आणि मनाला भिडणाऱ्या या गाण्याला संगीतही तसेच भारी दिले आहे. अनेक सुमधुर वाद्यांचा सुरेख मेळ आणि कोरसची साथ थेट काळजाला भिडते. या सगळ्या वाद्यांच्या साथीने मिलिंद इंगळे यांनी आपल्या आवाजाची अशी काही जादू केलीये की ऐकणारा अगदी गुंग होऊन जातो. हे गाणे सलग ऐकणे म्हणजे खऱ्या प्रेमाची एक मोठी सफर केल्यासारखे वाटते.
आजच्या काळात जिथे दोन किंवा तीन मिनिटांची गाणी हिट होतात तिथे एवढे मोठे गाणे लोक आजही आवडीने ऐकतात हे खरंच कमाल आहे. खरं प्रेम करणारे हे गाणे एकदा ऐकायला लागले की ३६ मिनिटे कशी निघून जातात हे त्यांनाही समजत नाही. आजही अनेकांच्या मोबाईलमध्ये हे गाणे जपून ठेवलेले पाहायला मिळते. मराठीत एवढ्या मोठ्या लांबीचे हे बहुधा एकमेव गाणे असावे. मिलिंद इंगळे यांचा आवाज आणि प्रेमाचे हे भन्नाट शब्द यामुळे हे गाणे मराठी संगीतातला एक एकदम भारी ठेवा बनले आहे.
