15 किलोचे दागिने, 5 किलोचा लहंगा, या गाण्यात अभिनेत्रीला झालेल्या प्रचंड जखमा, गाणं ठरलेलं प्रचंड सुपरहिट
15 किलोचे दागिने, 5 किलोचा लहंगा, 90 च्या दशकातील हे गाणं शूट करताना अभिनेत्रीला झाल्या होत्या प्रचंड जखमा. परदेशातील लोकांनी गाण्यावर केलेली पैशांची उधळण. गाणं ठरलेलं प्रचंड सुपरहिट.
90च्या दशकातील गाणी आजही प्रेक्षकांच्या मनावर राज्य करतात. या काळातील अनेक गाणी आजही पार्ट्या, लग्नसमारंभ आणि महफिलींमध्ये तितक्याच उत्साहाने वाजवली जातात. असंच एक आयकॉनिक गाणं म्हणजे अभिनेत्री उर्मिला मातोंडकरवर चित्रित झालेलं ‘छम्मा छम्मा’. 1998 मध्ये प्रदर्शित झालेल्या चायना गेट या चित्रपटातील हे गाणं रिलीज होताच प्रचंड लोकप्रिय झालं.
या गाण्याची लोकप्रियता इतकी मोठी होती की, नंतर त्याचा वापर हॉलिवूडच्या मौलिन रूज! या चित्रपटातही करण्यात आला. तसेच 2019 मध्ये प्रदर्शित झालेल्या फ्रॉड सैय्यां या चित्रपटासाठी ‘छम्मा छम्मा’चं मॉडर्न व्हर्जन तयार करण्यात आलं होतं. नेहा कक्कडने हे गाणं गायलं होतं.
15 किलो दागिने आणि 5 किलोचा लहंगा
‘छम्मा छम्मा’च्या शूटिंगदरम्यान उर्मिला मातोंडकर यांनी प्रचंड मेहनत घेतली होती. गाण्यातील बंजारण लूकसाठी त्यांनी तब्बल 5 किलो वजनाचा लहंगा आणि जवळपास 15 किलो वजनाचे दागिने परिधान केले होते. एवढं वजन अंगावर घेऊन त्यांनी गाण्यातील कठीण डान्स स्टेप्स सादर केल्या.
एका जुन्या सारेगामापा कार्यक्रमात उर्मिला मातोंडकरने या गाण्याशी संबंधित आठवणी सांगितल्या होत्या. कार्यक्रमात एका स्पर्धकाने ‘छम्मा छम्मा’ सादर केल्यानंतर उर्मिलाने गाण्याच्या शूटिंगच्या दिवसांची आठवण झाली. त्यावेळी त्यांनी या गाण्याच्या शूटिंगदरम्यान आलेला अनुभव सांगितला.
उर्मिलाच्या नृत्याचं भरभरून कौतुक
उर्मिलाने सांगितलं की, गाण्याच्या सुरुवातीच्या स्टेपमध्ये त्यांना साइड लूक द्यायचा होता. मात्र तिने पहिलीच स्टेप करताच तिच्या कानातील मोठ्या झुमक्याने कानाला जोरदार धक्का दिला. एवढंच नाही तर शूटिंग पूर्ण होईपर्यंत जड दागिन्यांमुळे तिच्या शरीरावर अनेक ठिकाणी ओरखडे आणि खुणा पडल्या होत्या.
गाण्याला प्रचंड लोकप्रियता मिळाली असली आणि प्रेक्षकांनी उर्मिलाच्या नृत्याचं भरभरून कौतुक केलं असलं तरी या गाण्याचा अनुभव अभिनेत्रींसाठी शारीरिकदृष्ट्या खूपच त्रासदायक ठरला होता.
परदेशातही झाली गाण्याची जोरदार चर्चा
उर्मिलाने याच कार्यक्रमात आणखी एक मजेशीर किस्सा सांगितला होता. तिच्या एका मित्राने न्यूयॉर्कहून फोन करून सांगितलं की, संपूर्ण चित्रपटादरम्यान प्रेक्षक शांत होते; मात्र ‘छम्मा छम्मा’ गाणं सुरू होताच भारतीयांसोबतच तिथल्या इतर लोकांनीही उत्साहाने पैसे उधळायला सुरुवात केली.
