कोट्यवधींची संपत्ती, आलिशान घरं आणि लक्झरी कार्स, वासू भगनानी की रकुल प्रीत सिंह; दोघांमध्ये श्रीमंत कोण ?

चित्रपटसृष्टीशी संबंधित आर्थिक व्यवहार, करातील अनियमितता आणि कथित मनी ट्रेलच्या पार्श्वभूमीवर आयकर विभागाच्या कारवाईच्या बातम्या समोर आल्यावर बॉलिवूडमध्ये मोठी खळबळ माजली. या आरोपांप्रकरणी आयकर विभागाने रकुल प्रीत सिंह, जॅकी भगनानी, वासू भगनानी आणि पॅनोरमा स्टुडिओजच्या अनेक ठिकाणांवर छापे टाकले. संपूर्ण प्रकरणात अनेक प्रॉडक्शन हाऊसेस आणि सेलिब्रिटींची नावे समोर आली, मात्र या सगळ्या घडामोडींमध्ये विशेष लक्ष वेधून घेतले ते वासू भगनानी आणि रकुल प्रीत सिंह यांच्या नात्याने. एकीकडे बॉलिवूडमध्ये गेल्या अनेक दशकांपासून सक्रिय असलेले दिग्गज निर्माता वासू भगनानी, तर दुसरीकडे आपल्या अभिनयाच्या जोरावर हिंदी तसेच दक्षिण भारतीय चित्रपटसृष्टीत ओळख निर्माण करणारी अभिनेत्री रकुल प्रीत सिंह. याच पार्श्वभूमीवर हे दोघे किती श्रीमंत आहे, त्यांची संपत्ती किती, ते जाणून घेऊया.

वासू भगनानी यांचं नेटवर्थ

‘पूजा एंटरटेनमेंट’ चे सर्वेसर्वा वासु भगनानी यांटं नाव बॉलिवूडच्या प्रसिद्ध निर्मात्यांमध्ये घेतलं जातं. ‘कुली नं. 1’, ‘बीवी नं. 1’ यांसारख्या लोकप्रिय चित्रपटांपासून ते मोठ्या बजेटच्या अलीकडील प्रकल्पांपर्यंत त्यांनी चित्रपटसृष्टीत दीर्घकाळ काम केलं आहे. त्यांनी एक मोठं साम्राज्य उभं केलं आहे. मीडिया रिपोर्ट्सनुसार, वासू भगनानी यांची अंदाजे संपत्ती सुमारे 2,500 कोटी रुपये असल्याचे सांगितलं जातं. मात्र, अशा सेलिब्रिटी नेटवर्थचे आकडे अधिकृतपणे जाहीर केलेले नसतात, त्यामुळे हे आकडे अंदाजावर आधारित मानले जातात.

त्यांच्या संपत्तीमध्ये रिअल इस्टेट आणि इतर गुंतवणुकींचा समावेश असल्याचं विविध रिपोर्ट्समध्ये नमूद करण्यात आले आहे. मुंबईतील वांद्रे परिसरातील आलिशान घर तसेच महागड्या लक्झरी कार्समुळेही त्यांची जीवनशैली अनेकदा चर्चेत राहिली आहे. लॅम्बॉर्गिनी, पोर्शे आणि मर्सिडीज-मेबॅक सारख्या अनेक गाड्या त्यांच्या ताफ्यात आहेत.

सून रकुलही  कोट्यवधींची मालकीण

दुसरीकडे, त्यांची सून रकुल प्रीत सिंगनेही तिच्या मेहनतीच्या जोरावर साऊथ फिल्म्सपासून ते बॉलिवूडपर्यंत स्वत:ची ओळख निर्माण केली. 2009 साली तिने अभिनय कारकिर्दीची सुरुवा केली. त्यानंतर तिने तेलुगू, तमिळ आणि हिंदी चित्रपटांमध्ये काम करत स्वतःची वेगळी ओळख निर्माण केली. विविध मीडिया रिपोर्ट्सनुसार, रकुल प्रीत सिंह हिचं अंदाजे नेटवर्थ 49 ते 50 कोटी रुपयांच्या आसपास असल्याचे सांगितलं जातं. अभिनयासोबतच ब्रँड एंडोर्समेंट्स आणि व्यावसायिक उपक्रमांमधूनही तिला उत्पन्न मिळतं. तसेच फिटनेस क्षेत्राशी संबंधित व्यावसायिक उपक्रमांमध्येही ती सहभागी असते. ‘F45’ नावाच्या फिटनेस स्टुडिओ चेनची ती सह-मालक आहे.

संपत्तीबाबत सांगायचं झालं तर मुंबईमध्ये तिचा आलिशान फ्लॅट आहे. तसेच हैदराबादच्या जुबली हिल्ससारख्या व्हीआयपी परिसरात तिचं आलिशान 3-BHK घरं आहे,. तिच्याकडे 3 कोटींची मर्सिडिझ-मेबॅक आणि अशा अनेक मोठ्या गाड्या आहेत.

तपास यंत्रणांच्या कारवाई आणि आर्थिक चौकशीच्या पार्श्वभूमीवर आज हे कुटुंब चर्चेत असले, तरी संपत्ती आणि ग्लॅमरच्या बाबतीत बॉलिवूडमधील ही ‘सासरे-सून’ जोडी नेहमीच इंडस्ट्रीतील श्रीमंत कुटुंबांमध्ये गणली जाते.