तुला सोडणार नाही, 5 लाख दे नाहीतर…बिग बॉस फेम दिव्या शिंदेकडून मारहाण; नेमके आरोप काय? प्रकरण काय?
पाच लाख रुपयांची खंडणी प्रकरणी बिग बॉस मराठी फेम रीलस्टार दिव्या शिंदेसह तिच्या साथीदारांवर गुन्हा दाखल करण्यात आला आहे. अशातच आता विद्याधर गायकवाड यांनी मोठा दावा केला आहे.
पुण्यातील कलाकार आणि सामाजिक क्षेत्राशी संबंधित विद्याधर गायकवाड यांनी दिव्या शिंदे आणि त्यांच्या काही साथीदारांविरोधात गंभीर आरोप केले आहेत. दिव्या शिंदे आपल्या जवळपास 18 साथीदारांसह घरी आल्या आणि आपण घरात एकटे असताना आपल्याला बेदम मारहाण केल्याचा दावा गायकवाड यांनी केला आहे. या घटनेप्रकरणी संबंधितांवर कठोर कारवाई करण्याची मागणीही त्यांनी केली आहे.
विद्याधर गायकवाड यांच्या म्हणण्यानुसार, दिव्या शिंदे आणि त्यांच्यासोबत आलेल्या व्यक्तींनी घरात प्रवेश करून त्यांना मारहाण केली. या मारहाणीत डोकं, मान, छाती आणि कमरेच्या वरच्या भागावर गंभीर स्वरूपाची मारहाण झाल्याचा त्यांचा आरोप आहे. तसेच, आपल्याला जीवे मारण्याच्या उद्देशाने मारहाण करण्यात आल्याचा दावाही त्यांनी केला आहे.
‘पाच लाख रुपये दे, नाहीतर तुला सोडणार नाही’
या घटनेदरम्यान आपल्याकडे पाच लाख रुपयांची मागणी करण्यात आली आणि पैसे न दिल्यास जीवे मारण्याची धमकी देण्यात आल्याचा आरोप गायकवाड यांनी केला आहे. ‘पाच लाख रुपये दे, नाहीतर तुला मी सोडणार नाही’, अशी धमकी दिल्याचे त्यांनी सांगितले.
बालगंधर्वमधील कार्यक्रमावरून वाद?
गायकवाड यांच्या म्हणण्यानुसार, बालगंधर्व रंगमंदिरात आयोजित करण्यात आलेल्या ‘कलाविष्कार’ कार्यक्रमाशी संबंधित हा वाद आहे. या कार्यक्रमासाठी दिव्या शिंदे यांना आपण आमंत्रण दिले नव्हते, असा दावा त्यांनी केला. मात्र, त्या कार्यक्रमाला आल्या आणि कार्यक्रमाची प्रसिद्धी आपण केली असल्याचे सांगत आपल्याकडे पाच लाख रुपयांची मागणी केल्याचा आरोप गायकवाड यांनी केला आहे.
या प्रकरणामुळे कार्यक्रमाच्या आयोजनासह आर्थिक मागणीवरूनही वाद निर्माण झाल्याचे गायकवाड यांच्या आरोपांवरून समोर येत आहे.
‘दिव्या शिंदे आणि त्यांच्या साथीदारांवर कठोर कारवाई करा’
या संपूर्ण प्रकरणात आपल्याला न्याय मिळावा, अशी मागणी विद्याधर गायकवाड यांनी केली आहे. दिव्या शिंदे आणि त्यांच्यासोबत असलेल्या व्यक्तींवर कठोर कायदेशीर कारवाई करण्यात यावी, अशी त्यांची मागणी आहे.
दरम्यान, या प्रकरणातील आरोपांबाबत दिव्या शिंदे यांची बाजू किंवा संबंधित तपास यंत्रणेकडून अधिकृत माहिती समोर आल्यास त्यातून घटनेची वस्तुस्थिती स्पष्ट होऊ शकते. सध्या उपलब्ध माहितीनुसार, गायकवाड यांनी केलेले हे आरोप आहेत; त्यांची स्वतंत्रपणे पुष्टी झालेली नाही.
