Nana Patekar: नाना पाटेकरांना अस्वस्थ वाटत होतं, तरी मित्राला फक्त मेसेज का केला? मुलगा मल्हारने सांगितलं कारण
Nana Patekar: नाना पाटेकरांना योग्य वेळी वैद्यकीत मदत मिळाली असती तर त्यांचे प्राण वाचू शकले असते, अशी भावना अनेकांकडून व्यक्त होत आहे. अशातच नानांनी अस्वस्थ वाटत असताना मित्राला फक्त मेसेज का केला, यामागच कारण मल्हारने सांगितलं आहे.
Nana Patekar: ज्येष्ठ अभिनेते नाना पाटेकर यांच्या निधनाने मराठी आणि हिंदी चित्रपटसृष्टीला मोठा धक्का बसला. आपल्या दमदार अभिनयाने प्रेक्षकांच्या मनावर राज्य करणाऱ्या नानांच्या जाण्याने त्यांचे चाहते, सहकलाकार आणि कुटुंबीयांवर दुःखाचा डोंगर कोसळला. मात्र, त्यांच्या आयुष्यातील शेवटच्या रात्री नेमकं काय घडलं, याबद्दल अनेकांना जाणून घ्यायचं आहे. आता नाना पाटेकर यांचा मुलगा मल्हार पाटेकर याने नुकत्याच दिलेल्या एका मुलाखतीत त्या रात्रीच्या आठवणी सांगितल्या आहेत. नानांना अस्वस्थ वाटत असतानाही त्यांनी सुरुवातीला मित्राला केवळ मेसेज का केला, यामागचं कारणही मल्हारने स्पष्ट केलं.
‘हिंदुस्तान टाइम्स’ला दिलेल्या मुलाखतीत मल्हारने सांगितलं, “नाना पाटेकर त्या वेळी गोव्यात होते. माझा चुलत भाऊ प्रसाद हा नानांच्या मनोरंजन क्षेत्राशी संबंधित भेटीगाठी आणि कामकाज पाहत असे. मात्र, नानांनीच त्याला मुंबईला जाण्यास सांगितलं होतं. कारण दुसऱ्याच दिवशी नानांना माधुरी दीक्षित यांच्यासोबत ‘केबीसी मराठी’च्या शूटिंगसाठी उपस्थित राहायचं होतं. माझा दुसरा भाऊ अमय यानेही नाना घराच्या वरच्या मजल्यावर स्थिरस्थावर झाल्यानंतरच तिथून प्रस्थान केलं होतं. त्यानंतर नाना गोव्यात एकटे असताना त्यांना अस्वस्थ वाटू लागलं.”
या प्रसंगाची आठवण सांगताना मल्हारने वडिलांच्या स्वभावातील एक महत्त्वाची गोष्ट अधोरेखित केली. मल्हार पुढे म्हणाला, नाना पाटेकर यांचा स्वभाव असा होता की ते कोणालाही विनाकारण त्रास देत नसत. स्वतःला काही अडचण आली, तरी इतरांना त्रास होऊ नये, याची ते काळजी घेत असत. त्यामुळे अस्वस्थ वाटू लागल्यानंतरही त्यांनी सुरुवातीला मित्राला फोन करण्याऐवजी मेसेज केला. मल्हारने सांगितलं की, नानांनी आधी मित्राला संदेश पाठवला आणि काही वेळानंतर मित्राने फोनही केला. मित्राला परिस्थितीची कल्पना येताच तो तातडीने नानांकडे पोहोचला. मात्र, तोपर्यंत उशीर झाला होता.
नाना पाटेकर यांच्या निधनाची बातमी मल्हारला कशी समजली, हे सांगताना त्याचा कंठ दाटून आला होता. त्या वेळी मल्हार पुण्यात होता. पहाटे साधारण 5 वाजता त्याच्या आईचा फोन आला. त्यानंतर नेमकं काय घडलं, हेही आपल्याला आठवत नसल्याचं त्याने सांगितलं.
‘त्यानंतर काय झालं, हेच आठवत नाही. माझ्या आजूबाजूचं संपूर्ण जग जणू थांबलं होतं,’ अशा शब्दांत मल्हारने त्या क्षणातील दुःख व्यक्त केलं.
