एआय बॉयफ्रेंडच्या प्रेमात, चक्क 1.7 कोटी रुपये पाठवले; 80 वर्षीय महिलेच्या लव्ह स्टोरीचा अचंबित करणारा शेवट; नेमकं काय घडलं?

सोशल मीडियावर मैत्री झाली, त्यातून संवाद सुरू झाले आणि मग प्रेम, हे आपण बऱ्याचदा पाहतो. काही जोडप्यांनी तर लग्नही केली आहेत. ब्रिटनमधील एका ८० वर्षीय महिलेचा विश्वास होता की, फेसबुकवर भेटलेला एक पुरुष तिचा खरा जोडीदार आहे. पण ती ज्या व्यक्तीवर विश्वास ठेवत होती, ती केवळ एक व्यक्ती नसून, फसवणूक करणाऱ्यांची एक टोळी होती. फसवणूक करणाऱ्यांनी एका बनावट प्रियकराचा फोटो आणि व्हॉइस मेसेज तयार करण्यासाठी एआय (AI) चा वापर केला. त्यानंतर, आजारपण आणि अपहरणाच्या खोट्या कहाण्या रचून, त्यांनी त्या महिलेची जवळपास 1.7 कोटींची फसवणूक केली.

काय घडलं नेमकं?

डेली स्टारच्या वृत्तानुसार, ही घटना ब्रिटनमध्ये घडली आहे. त्या महिलेची ओळख जाहीर करण्यात आलेली नाही. तिच्या मुलीनं बीबीसीला सांगितलं की, तिची आई फेसबुकवर भेटलेल्या एका पुरुषाच्या प्रेमात होती. तिला वाटत होतं की, त्यांचं नातं खरं आहे, पण पडद्यामागे असलेले फसवणूक करणारे तिच्या भावनांचा गैरफायदा घेत होते.

फसवणूक करणाऱ्यांनी त्या महिलेकडून पैसे उकळण्यासाठी विविध पद्धती वापरल्या. कधी ते बनावट प्रियकराच्या गंभीर आजाराबद्दलच्या कहाण्या सांगायचे, तर कधी त्याला महागड्या शस्त्रक्रियेची गरज असल्याचा दावा करायचे. त्या महिलेला खात्री पटली होती की, उपचारासाठी पैशांची गरज आहे.

एके दिवशी त्या महिलेनं एका पुस्तकात लपवून अंदाजे १०,००० पाउंड, म्हणजेच अंदाजे ११ लाख रुपये पाठवले. हे पैसे शांघायमधील एका रुग्णालयात पोहोचवले जाणार आहेत, असं तिला सांगण्यात आलेलं. त्या महिलेला वाटलं की, ती तिच्या आजारी जोडीदाराला मदत करत आहे, पण प्रत्यक्षात हा एका फसवणुकीचा भाग होता.

खोट्या प्रियकराच्या अपहरणाची कहाणी

फसवणूक करणारे तिथेच थांबले नाहीत. त्यांनी आणखी एक भयानक कथा रचली. त्या महिलेला सांगण्यात आलं की, तिच्या बॉयफ्रेंडला किडनॅप करण्यात आलं आहे आणि खंडणी न दिल्यास त्याला ठार मारलं जाईल. आपल्या बॉयफ्रेंडचा जीव वाचवण्यासाठी त्या महिलेनं पुन्हा पैसे पाठवले. तिला हे माहीत नव्हतं की, ही अपहरणाची कहाणीसुद्धा खोटी होती आणि तिच्याकडून आणखी पैसे उकळण्याच्या उद्देशानं रचली गेली होती. त्या महिलेनं फसवणूक करणाऱ्यांना अंदाजे १,४०,००० पाउंड, म्हणजेच अंदाजे १.७ कोटी रुपये दिले. तिच्या बँकेने आतापर्यंत अंदाजे ४५,००० पाउंड परत केले आहेत.

जेव्हा मुलीला तिच्या आईच्या फसवणुकीबद्दल कळलं, तेव्हा तिला परिस्थिती हाताळणं कठीण गेलं. तिनं आपल्या आईला समजावून सांगण्याचा आणि तिला त्या रिलेशनमधून बाहेर काढण्याचा प्रयत्न केला. पण तिची आई काही केल्या ऐकत नव्हती.

या प्रकरणात, फसवणूक करणाऱ्यांनी कथितरित्या एआय वापरून एका खोट्या व्यक्तीचे फोटो आणि व्हॉइस नोट्स तयार केले. यामुळे त्या महिलेला वाटलं की, ती एका खऱ्या व्यक्तीशी बोलत आहे. या प्रकारच्या फसवणुकीत, फसवणूक करणारे प्रथम भावनिक संबंध निर्माण करतात आणि नंतर आजारपण, प्रवास, अडचण किंवा आपत्कालीन परिस्थितीचं ढोंग करून पैशांची मागणी करतात.