ट्रम्प यांच्या नव्या टॅरिफमुळे अनेक देश मोठ्या संकटात, पण भारत, चीनला मोठा फायदा
सुप्रीम कोर्टाच्या निर्णयानंतर डोनाल्ड ट्रम्प यांनी आपल्या टॅरिफ धोरणामध्ये मोठा बदल केला आहे. त्याचा फटका अनेक देशांना बसला आहे. परंतु नव्या टॅरिफ धोरणामुळे भारत आणि चीनचा फायदा झाल्याचं समोर आलं आहे.
अमेरिकेचे राष्ट्राध्यक्ष डोनाल्ड ट्रम्प यांनी संपूर्ण जगभरात टॅरिफ वॉर सुरू केलं, जो देश अमेरिकेच्या धोरणांच्या विरोधात जाईल, त्या -त्या देशांवर डोनाल्ड ट्रम्प यांनी मोठा टॅरिफ लावला. मात्र दोन दिवसांपूर्वी अमेरिकेच्या सुप्रीम कोर्टाने डोनाल्ड ट्रम्प यांना मोठा धक्का दिला. डोनाल्ड ट्रम्प यांनी लावलेला टॅरिफ हा बेकायदेशीर असल्याचं अमेरिकेतील सुप्रीम कोर्टानं म्हटलं. सुप्रीम कोर्टाचा हा निर्णय ट्रम्प यांच्यासाठी मोठा धोरात्मक आणि राजकीय धक्का असल्याचं बोललं जातं आहे. मात्र सुप्रीम कोर्टाचा निर्णय आल्यानंतर अवघ्या काही तासांमध्येच डोनाल्ड ड्रम्प यांनी या निर्णयाविरोधात जोरदार पलटवार केला, त्यांनी सर्वच देशांवर दहा टक्के टॅरिफ लावण्याची घोषणा केली. त्यानंतर त्यांनी हा टॅरिफ वाढून 15 टक्के इतका केला. डोनाल्ड ट्रम्प यांच्या या टॅरिफ निर्णयामुळे जागतिक बाजारात एक विचित्र स्थिती निर्माण झाली आहे. एकीकडे भारत, चीन, ब्राझिल सारख्या देशांना या निर्णयाचा मोठा फायदा झाला आहे, तर दुसरीकडे मात्र अनेक देश मोठ्या संकटात सापडले आहेत.
भारतासाठी प्रगतीचं महाद्वार
भारत रशियाकडून तेलाची खरेदी करतो म्हणून डोनाल्ड ट्रम्प यांनी भारतावर अतिरिक्त 25 टक्के टॅरिफसह एकूण 50 टक्के टॅरिफ लावला होता. त्याचा भारतीय निर्यातदारांना मोठा फटका बसत होता. मात्र त्यानंतर अमेरिकेने हा टॅरिफ कमी करून 25 टक्के इतका केला, दरम्यान आता हा टॅरिफ 25 टक्क्यांवरून 18 टक्के करण्यास दोन्ही देशांनी सहमती दर्शवली आहे. दरम्यान शुक्रवारी सुप्रीम कोर्टाचा निर्णय आला आणि या निर्णयानंतर सर्वच देशांवर 15 टक्के टॅरिफ लावण्याचा निर्णय ट्रम्प यांनी घेतला, यामुळे भारताचा फायदा झाला आहे, कारण पूर्वीच्या 18 टक्के टॅरिफपेक्षा हा 15 टक्के टॅरिफ कमी आहे, तर दुसरीकडे चीनवर अमेरिकेनं लावलेला अतिरिक्त 10 टक्के फेंटॅनिल टॅरिफ ट्रम्प यांच्या नव्या आदेशामुळे रद्द झाल्यानं चीनला देखील याचा मोठा फयदा होणार आहे.
मात्र काही देश असे आहेत, ज्यांच्यावर टॅरिफ नव्हता, परंतु आता नव्या आदेशामुळे त्यांच्यावर देखील 15 टक्के टॅरिफ लागल्यानं त्यांना मोठा फटका बसणार आहे. तसेच पूर्वी भारताची स्पर्धा ही ज्या देशांवर टॅरिफ नव्हता अशा देशांसोबत होती, त्यामुळे निर्यातदारांना मोठा फटका बसला होता. मात्र आता सर्वांवरच टॅरिफ असल्यामुळे त्याचा भारताला अप्रत्यक्ष मोठा फायदा होणार आहे.
