युद्ध सुरू असतानाच चीनची सर्वात मोठी घोषणा, मध्य पूर्वेत जाऊन थेट… एका निर्णयाने मोठा बदल होणार!
एकीकडे इराण आणि इस्रायल यांच्यात मोठे युद्ध चालू असतानाच दुसरीकडे चीन या देशाने महत्त्वाची घोषणा केली आहे. या घोषणेनंतर आता भविष्यात मध्य-पूर्वेत काय होणार? याकडे सर्वांचे लक्ष लागले आहे.
Iran Israel War : इराण इस्रायल यांच्यात युद्ध भडकले आहे. या युद्धात अमेरिकादेखील इस्रायलला ताकद पुरवत आहे. त्यामुळेच हे युद्ध आणखी चिघळण्याची शक्यता आहे. इराणकडून आखाती देशांवरही हल्ले केले जात आहेत. त्यामुळे भविष्यात या युद्धाची व्याप्ती वाढू शकते, असा अंदाज व्यक्त केला जातोय. हा अंदाज खरा ठरला तर भविष्यात संपूर्ण जगाला या संघर्षाचा फटका बसू शकतो. त्याचे प्रातिनिधीक उदाहरण म्हणून भारतातील शेअर बाजार घसरणीला लागला आहे. कच्च्या तेलाचा पुरवठादेखील थांबला आहे. असे असतानाच आता चीनने मोठी घोषणा केली आहे. एकीकडे हे युद्ध सुरू असताना दुसरीकडे चीनच्या सरकारने केलेल्या या घोषणेला विशेष महत्त्व आले आहे.
युद्धाच्या बाबतीत चीनची नेमकी भूमिका काय?
अमेरिका-इस्रायल आणि इराण यांच्यात जे युद्ध चालू आहे. त्या युद्धावर भारताने अद्याप कोणतीही प्रतिक्रिया दिलेली नाही. परंतु चीन, रशिया, फ्रान्स यासारख्या देशांनी मात्र उघडपणे आपली भूमिका जाहीर केली आहे. चीनने आणि रशियाने अमेरिकेने इराणवर केलेल्या हल्ल्यांना विरोध केला आहे. चीनने इराणची बाजू घेतली आहे. इराणने सध्या होर्मुझची सामुद्रधुनी बंद केली आहे. चीन वगळता इतर कोणत्याही देशाचे जहाज या सामुद्रधुनीतून जाऊ देण्यास इराणने नकार दिला आहे. त्यानंतर आता चीनने मोठी घोषणा केली आहे.
चीनने नेमकी काय घोषणा केली आहे?
मध्य पूर्वेत सध्या तणावाची स्थिती आहे. हीच बाब लक्षात घेऊन चीनने आम्ही या भागात आपला विशेष दूत पाठवणार आहोत, असे जाहीर केले आहे. युद्धामध्ये मध्यस्थी घडवून आणण्यासाठी हा दूत पाठवण्यात येईल, असे चीनकडून सांगण्यात आले आहे. चीनच्या भारतातील राजदूत यू जिंग यांनी सोशल मीडियावर तशी माहिती दिली आहे.
दरम्यान, चीनच्या या भूमिकेनंतर भविष्यात नेमकं काय होणार? याकडे सर्वांचे लक्ष लागले आहे. चीनने मध्यस्थी केलीच तर इराण-इस्रायल यांच्यातील युद्ध संपणार का? हेदेखील पाहणे महत्त्वाचे ठरणार आहे.
