Diwali 2026: 8 की 9 नोव्हेंबर, कोणत्या दिवशी साजरी होणार दिवाळी? कधी करायचं लक्ष्मीपूजन? जाणून घ्या

Laxmi Pujan 2026

दिवाळी हा हिंदू धर्मातील सर्वात मोठा आणि महत्त्वाचा सण आहे. दरवर्षी कार्तिक महिन्यातील अमावस्येला दिवाळीचा सण मोठ्या उत्साहात साजरा केला जातो. या दिवशी घरोघरी दिवे लावले जातात, आकर्षक रांगोळ्या काढल्या जातात आणि देवी लक्ष्मीची विधीवत पूजा केली जाते. धार्मिक मान्यतेनुसार, दिवाळीच्या दिवशी लक्ष्मीपूजन केल्याने घरात सुख-समृद्धी, धन आणि आनंद नांदतो. मात्र, यंदा दिवाळीच्या तारखेबाबत अनेकांच्या मनात गोंधळ निर्माण झाला आहे. काही जण 8 नोव्हेंबरला तर काही जण 9 नोव्हेंबरला दिवाळी असल्याचे सांगत आहेत. त्यामुळे लक्ष्मीपूजन नेमके कोणत्या दिवशी करायचे, असा प्रश्न अनेकांना पडला आहे. चला तर जाणून घेऊया यंदा दिवाळी कधी साजरी करायची आणि लक्ष्मी पूजनासाठी कोणता दिवस शुभ आहे.

दिवाळी ८ की ९ नोव्हेंबरला? जाणून घ्या योग्य तारीख

हिंदू पंचांगानुसार, यंदा दिवाळीचा सण रविवार, 8 नोव्हेंबर 2026 रोजी साजरा केला जाणार आहे. दिवाळी हा सण कार्तिक अमावस्येला साजरा करण्याची परंपरा आहे. यंदा अमावस्या तिथी 8 नोव्हेंबर रोजी सकाळी 11 वाजून 27 मिनिटांनी सुरू होणार असून 9 नोव्हेंबर रोजी दुपारी 12 वाजून 31 मिनिटांनी समाप्त होईल. त्यामुळे अमावस्या तिथी दोन्ही दिवशी असली तरी पंचांगानुसार 8 नोव्हेंबर रोजी दिवाळी साजरी करणे शुभ मानले जाते. याच दिवशी संध्याकाळी देवी लक्ष्मीची विधीवत पूजा केली जाणार आहे.

लक्ष्मीपूजनाचा शुभ मुहूर्त कोणता?

यंदा दिवाळीच्या दिवशी म्हणजेच 8 नोव्हेंबर रोजी प्रदोष काळ संध्याकाळी 5 वाजून 31 मिनिटांपासून रात्री 8 वाजून 9 मिनिटांपर्यंत असणार आहे. काही पौराणिक मान्यतांनुसार, दिवाळीच्या दिवशी प्रदोष काळात देवी लक्ष्मीची पूजा करण्याला विशेष महत्त्व आहे. या काळात लक्ष्मीपूजन केल्याने देवी लक्ष्मीचा आशीर्वाद मिळतो, अशी मान्यता आहे. पंचांगानुसार, देवी लक्ष्मी आणि भगवान गणेश यांच्या पूजेसाठी संध्याकाळी 5 वाजून 54 मिनिटांपासून रात्री 7 वाजून 50 मिनिटांपर्यंत शुभ मुहूर्त सांगण्यात आला आहे. मात्र, शहरानुसार पूजेच्या वेळेत थोडा फरक असू शकतो.

दिवाळीत लक्ष्मीपूजनाचे महत्त्व

हिंदू धर्मात दिवाळीच्या दिवशी देवी लक्ष्मी, गणपती बाप्पा आणि कुबेर देवतेची पूजा करण्याला विशेष महत्त्व आहे. धार्मिक मान्यतेनुसार, या दिवशी मनोभावे लक्ष्मीपूजन केल्याने घरात सुख-समृद्धी, धन आणि आनंद नांदतो. त्यामुळे दिवाळीच्या दिवशी घरोघरी दिवे लावून आणि आकर्षक सजावट करून देवी लक्ष्मीची पूजा केली जाते.

(डिस्क्लेमर : वरील माहिती उपलब्ध स्रोतावरून देण्यात आलेली आहे. याच्या तथ्यांबद्दल आम्ही कुठलाही दावा करीत नाही, तसेच अंधश्रद्धेला दुजोरा देत नाही)