अमेरिकन नागरिकांना फसवणाऱ्या बोगस अॅमेझॉन कॉल सेंटरचा पर्दाफाश, नवी मुंबईत 7 जणांना बेड्या
बोगस कॉल सेंटर चालवून अमेरिकन नागरिकांची फसवणूक करणाऱ्या सात जणांना नवी मुंबई पोलिसांनी आज बेड्या ठोकल्या. ही चोरी करण्यासाठी त्यांनी अॅमेझॉनचा कॉल डेटा हॅक केल्याचे चौकशीत उघड झाले आहे.
नवी मुंबईः अॅमेझॉनचे बोगस कॉलसेंटर (Bogus call center) चालवून त्यातून अमेरिकन नागरिकांना फसवणाऱ्या लोकांची बनवेगिरी नवी मुंबई पोलिसांनी (Navi Mumbai Police) उघडी पाडली आहे. या बोगस कॉल सेंटरचा आज (22 नोव्हेंबर) पोलिसांनी पर्दाफाश केला असून या गुन्ह्याखाली 7 जणांना अटक केली आहे. त्यांच्याकडून 10 लॅपटॉपसह इतर सायबर गुन्हेगारीसाठीचे (Cyber crime) साहित्य जप्त करण्यात आले आहे.
अकाउंट हॅक झाल्याचे सांगत होते चोर
पोलिसांनी दिलेल्या अधिक माहितीनुसार, ऐरोली सेक्टर 20 मधील शिवशंकर हाईट इमारतीत अॅमेझॉन नावाने हे लोक बोगस कॉल सेंटर चालवत होते. या कॉल सेंटरमधून अमेरिकन नागरिकांना फोन केले जात होते. तुमचे अकाउंट हॅक झाल्याचे सांगून ते परत चालू करायचे असेल तर आपल्याला काही रक्कम भरावी लागेल, ती आपल्याला चेकद्वारे परत दिली जाईल, असे आश्वासन दिले जात होते. खातेधारकांनी दिलेली रक्कम हे लोक आपल्या अकाउंटवर वळवून घेत असत. अशा प्रकारे या लोकांना अनेक अमेरिकन नागरिकांना फसवल्याचे चौकशीत मान्य केले आहे.
अॅमेझॉनचा कॉल डेटा चोरून रचला सायबर चोरीचा कट
विशेष म्हणजे असा प्रकारे चोरी करण्यासाठी या लोकांनी अॅमेझॉनचा कॉल डेटा हॅक केल्याचे सांगितले आहे. या कारवाईत सात आरोपींना जेरबंद करण्यात पोलिसांना यश आले आहे. या आरोपींकडून 10 लॅपटॉप, 2 राऊटर, 8 मोबाइल, 4 हेडफोन आणि मुद्देमाल जप्त करण्यात आला आहे. दरम्यान आरोपींना 23 नोव्हेंबरपर्यंत पोलीस कोठडी सुनावण्यात आली आहे.
इतर बातम्या-
‘मराठा समाजाची माफी मागा, पुन्हा आरक्षण मिळवून द्या’, प्रवीण दरेकरांचं ठाकरे सरकारला आवाहन
ही कसली दुश्मनी ? 33 एकरातील भात पिकाच्या गंजीला लावली आग, भंडाऱ्यात असे काय झाले?
