नवोदित अभिनेत्याचा मृतदेह मुंबईतील घरी आढळला, कुटुंबीयांना हत्येचा संशय

अभिनेता अक्षत उत्कर्षचा मृतदेह रविवारी रात्री मुंबईतील त्याच्या राहत्या घरी पंख्याला लटकलेल्या अवस्थेत आढळला

Anish Bendre | Updated on: Sep 29, 2020 | 2:10 PM

मुंबई : बॉलिवूड अभिनेता सुशांतसिंह राजपूतच्या मृत्यू प्रकरणाचे गूढ अद्याप उकलले नसतानाच बिहारमधून मुंबईत आलेल्या आणखी एका अभिनेत्याचा धक्कादायक मृत्यू झाला आहे. नवोदित अभिनेता अक्षत उत्कर्षचा मृतदेह मुंबईतील राहत्या घरी संशयास्पद अवस्थेत आढळला आहे. अक्षतच्या कुटुंबीयांनी हत्येचा संशय व्यक्त केला आहे. (Bihar’s Actor Akshat Utkarsh found dead at Mumbai Home family suspect murder)

चित्रपट क्षेत्रात नशिब आजमावण्याच्या उद्देशाने अक्षत उत्कर्ष डोळ्यात स्वप्न घेऊन बिहारहून मुंबईला आला होता. गेल्या काही काळापासून तो अभिनय क्षेत्रात कार्यरत होता. मात्र अचानक त्याच्या निधनाच्या वृत्ताने कुटुंबीय आणि मित्र मंडळी हादरले आहेत.

अक्षतचा मृतदेह रविवारी रात्री मुंबईतील त्याच्या राहत्या घरी पंख्याला लटकलेल्या अवस्थेत आढळला होता. अभिनेता त्रिपुरारी कुमार चौधरी याने त्याच्या मृत्यूची बातमी फेसबुकवर शेअर करत “बॉलिवूड, स्थानिग उद्योग बाहेरील लोकांना काम देत नाहीत आणि कलाकारांना आत्महत्या करण्यासाठी दबाव आणत आहेत” असा आरोप केला.

कोण होता अक्षत उत्कर्ष?

अक्षत उत्कर्ष बिहारमधील मुझफ्फरनगर जिल्ह्यातील सिकंदरपूर गावचा रहिवासी होता. रविवारी मृत्यूच्या काही वेळ आधीच त्याचे वडिलांशी फोनवर बोलणेही झाले होते. त्यावेळी सगळे काही ठीक होते, मात्र रात्री उशिरा अचानक त्याच्या निधनाची बातमी आली. त्यामुळे शेवटच्या फोननंतर अचानक असे काय घडले, असा सवाल अक्षतचे मामा रंजित सिंह यांनी विचारला आहे.

मुंबई पोलिसांनी आपल्याला सहकार्य न केल्याचा आरोप अक्षतच्या नातेवाईकांनी केला आहे. एफआयआर दाखल करण्यात आला आहे, मात्र मुंबई पोलिसांनी अधिक माहिती देत नाहीत, असा दावा केला जात आहे. अक्षतचे पार्थिव अंत्यसंस्कारांसाठी मुंबईहून पाटण्याला पाठवण्यात आले आहे.