…म्हणून गृहमंत्र्यांनी पोलिस नाईक प्रशांत घरत यांना ठोकला सॅल्यूट

मुंबई : गेट वे ऑफ इंडियाहून अलिबागला जाताना अपघातग्रस्त झालेल्या प्रवासी बोटीतील 88 प्रवाशांचे प्राण वाचवणाऱ्या पोलिसाला गृहमंत्र्यांनी सॅल्यूट ठोकला. अनिल देशमुख यांनी मांडवा पोलिस ठाण्याचे पोलिस नाईक प्रशांत घरत यांचं जाहीर कौतुक केलं. (Anil Deshmukh Salutes Prashant Gharat)

‘पोलिस नाईक प्रशांत घरत यांनी प्रसंगावधान राखत केलेल्या कामगिरीमुळे अलिबागला जाणाऱ्या लाँचमधील 88 प्रवाशांचा प्राण वाचला. अवघ्या महाराष्ट्राच्या कौतुकाला पात्र ठरलेल्या या बहादुराला गृहमंत्री म्हणून माझाही महासॅल्यूट’ असं अनिल देशमुख यांनी ट्विटरवर म्हटलं आहे.

गेट वे ऑफ इंडियाहून अलिबागला जाणा-या प्रवासी लाॅंच च्या अपघातात मांडवा पोलीस ठाण्याचे पोलीस नाईक प्रशांत घरत यांनी प्रसंगावधान राखत केलेल्या कामगिरीमुळे ८८ प्रवाशांचा प्राण वाचला! अवघ्या महाराष्ट्राचे कौतुकास पात्र ठरलेल्या या बहादुराला गृहमंत्री म्हणून माझाही #MahaSalute pic.twitter.com/FbSKW7Islf

— ANIL DESHMUKH (@AnilDeshmukhNCP) March 15, 2020

कसा झाला अपघात?

मुंबईहून मांडव्याच्या दिशेने जाणारी प्रवासी बोट शनिवार 14 मार्च रोजी अलिबागजवळच्या समुद्रात उलटली होती. यावेळी बोटीत 88 प्रवासी होते, मात्र सुदैवाने सर्वांची सुखरुप सुटका झाल्यामुळे मोठा अनर्थ टळला.

बोट खडकावर आदळल्यानंतर एकच गोंधळ उडाला होता. अपघातानंतर बोट एका दिशेने कलंडली होती. मात्र मांडवा पोलिस कर्मचारी प्रशांत घरत आणि ‘सद्गुरु कृपा’ बोटीचे दोन खलाशी बचावकार्याला आले.

पोलिसांच्या पेट्रोलिंग बोटीवरुन बहुतांश प्रवाशांना सुखरुप जेट्टीवर पोहचवण्यात आले. अन्य काही जणांना स्पी़ड बोटीच्या मदतीने किनाऱ्यावर पोहोचवण्यात आले. सर्व प्रवाशांची वेळीच सुटका झाल्यामुळे मोठा अपघात टळला.

भाऊचा धक्का ते मांडवा दरम्यान रो रो सेवा आजच मुख्यमंत्री उद्धव ठाकरे यांच्या हस्ते सुरु करण्यात आली. या बोटीच्या चाचणीवेळीही मांडवा टर्मिनलवर बोट धडकून अपघात झाला होता. सुदैवाने त्यावेळीही अपघाताची व्याप्ती मोठी नव्हती.

अरबी समुद्रात होत असलेल्या शिवस्मारकाच्या पायाभरणीच्या कार्यक्रमासाठी जात असलेल्या बोटींच्या ताफ्यातील एका स्पीड बोटला दीड वर्षांपूर्वी अपघात झाला होता. ही बोटही खडकावर आदळून बुडाली होती. बोटीवर असलेल्या 25 जणांपैकी 24 जणांना वाचवण्यात यश आलं होतं, तर सिद्धेश पवार या तरुणाचा बुडून मृत्यू झाला होता. (Anil Deshmukh Salutes Prashant Gharat)