डांबर टाकलंय की नुसत्या रेघा ओढल्यात? राज्यमंत्री प्राजक्त तनपुरेंकडून अधिकाऱ्यांची खरडपट्टी

मुंबई/अहमदनगर : राष्ट्रवादीचे नेते आणि नागरी विकास राज्यमंत्री प्राजक्त तनपुरे (Prajakt Tanpure) रस्त्यावरील खड्डे बुजवण्याच्या कामावरुन अधिकाऱ्यांवर चांगलेच संतापले. अहमदनगर दौऱ्यावर असताना खड्डे बुजवण्याच्या कामातील हलगर्जी दिसून आल्याने तनपुरेंनी फोन करुन अधिकाऱ्यांना झापले. (Minister Prajakt Tanpure slams senior officers for Negligence in filling the pits)

प्राजक्त तनपुरे यांनी वांबोरी-अहमदनगर रस्त्यावर खड्डे बुजवण्याच्या कामाची पाहणी केली. खड्डे बुजवण्याच्या कामात डांबर, खडी योग्य प्रमाणात नसल्याचे त्यांच्या निदर्शनास आले. या संबंधात त्यांनी वरिष्ठ अधिकाऱ्यांना कामाची पाहणी करुन अहवाल सादर करण्याचे आणि संबंधितांवर ताबडतोब कारवाई करण्याचे आदेश दिले आहेत.

“माझ्या मतदारसंघात रस्त्याच्या कामाच्या बाबतीत कोणताही बेजबाबदारपणा खपवून घेतला जाणार नाही. सर्वसामान्य जनतेच्या कररुपी पैशाचा विनियोग अत्यंत योग्य पद्धतीनेच झाला पाहिजे, यावर माझे बारीक लक्ष असणार आहे” अशा शब्दात तनपुरे यांनी फोनवर समज दिली. सध्या त्यांचा व्हिडीओ सोशल मीडियावर चांगलाच व्हायरल होत आहे.

काय म्हणाले तनपुरे?

“कुलकर्णी साहेब नमस्कार, मी इथं डोंगरगणजवळ आहे. नगरवरुन वांबोरला जाणाऱ्या रस्त्याचे खड्डे बुजवण्याचं काम सुरु आहे. काल मी त्याचे स्पेसिफिकेशन्स मागवून घेतले. टेंडरची काय काय कंडिशन आहे, त्याचा काल सकाळी अभ्यास केला. खालचा डांबराचा जो थर आहे, तो अक्षरशः न दिल्यासारखाच आहे, मी स्वतः इथे स्पॉटवर आहे.” असं तनपुरे फोनवर बोलत असल्याचं व्हिडीओमध्ये ऐकू येतं.

“हे असं नाही चालणार, एक तर पैसे इथे आणताना नाकी नऊ येतात आणि असा जर उपयोग होणार असेल, तर नाही चालणार. तुमचा कोण तो इंजिनिअर आहे, मला सस्पेंड झालेला पाहिजे. आपण दरवर्षी खड्डेच बुजवत राहायचं का? मला तुमची कॅटेगरी डिव्हिजन काय ते माहिती नाही, पण जो कोणी इंजिनिअर आहे, तो उद्याच्या उद्या सस्पेंड झालेला पाहिजे. जनतेच्या पैशाचं वेस्टेज आहे हे” अशा शब्दात प्राजक्त तनपुरे यांनी अधिकाऱ्यांना झाडलं.

अधिकाऱ्यांशी बोलून झाल्यानंतर प्राजक्त तनपुरे यांनी टवले नावाच्या कंत्राटदाराला स्पीकरवर फोन ठेवून समज दिली. “डांबर टाकलंय की नुसत्या रेघा ओढल्यात? त्याचा नीट थर पसरवून खडी टाकली पाहिजे” असं तनपुरे म्हणाले.

(Minister Prajakt Tanpure slams senior officers for Negligence in filling the pits)

नगर दौऱ्यावर असताना वांबोरी नगर रस्त्यावर खड्डे बुजवण्याच्या कामाची पाहणी केली. खड्डे बुजवण्याच्या कामात डांबर, खडी प्रमाणात नसल्याचे निदर्शनास आले. यासंबंधी वरीष्ठ अधिकाऱ्यांनी कामाची पाहणी करून अहवाल सादर करावे आणि संबंधितावर ताबडतोब कारवाई करण्याचे आदेश दिले आहेत. pic.twitter.com/KOPTl6aE28

— Prajakt Prasadrao Tanpure (@prajaktdada) November 30, 2020

संबंधित बातम्या :

राष्ट्रवादी प्रवेशासाठी नगरचे अनेक नेते इच्छुक, राज्यमंत्री प्राजक्त तनपुरेंच्या दाव्याने खळबळ

मंत्रालयाबाहेर अंधारातच राज्यमंत्री प्राजक्त तनपुरेंचा ‘जनता दरबार’

(Minister Prajakt Tanpure slams senior officers for Negligence in filling the pits)