फॉर्च्युनरवर पोकलेन कोसळून अपघात, ताफा थांबवून शरद पवारांकडून विचारपूस!
राष्ट्रवादी काँग्रेसचे अध्यक्ष शरद पवार यांचा ताफा जात असताना, परिसरात मोठा अपघात झाल्याचं निदर्शनास आलं. (Sharad Pawar stops convoy)
पुणे : राष्ट्रवादी काँग्रेसचे अध्यक्ष शरद पवार यांचा ताफा जात असताना, परिसरात मोठा अपघात झाल्याचं निदर्शनास आलं. गर्दी झालेली पाहून शरद पवारांनी आपला ताफा थांबवून चौकशी केलीच, शिवाय नुकसानभरपाई संदर्भात संबंधितांशी लवकर संपर्क करावा, अशा सूचनाही पवारांनी केल्या. पवारांनी धीर दिल्याची भावना यावेळी संबंधितांनी व्यक्त केली. (Sharad Pawar stops convoy)
नेमकं काय घडलं?
मावडी कप (ता. पुरंदर) इथे बप्पा चाचर यांचे पोकलेन मशीन ट्रकमधून उतरवलं जात होतं. त्यावेळी ते भलंमोठं पोकलेन मशीन चाचर यांच्या फॉर्च्युनर गाडीवर पडलं. अवाढव्य पोकलेन मशीन फॉर्च्युनरवर पडल्यामुळे या गाडीचं मोठं नुकसान झालं. केवळ पोकलेन मशीन सुरु असताना अनेक लोक जमतात, मात्र पोकलेन मशीन फॉर्च्युनरवर पडल्याने झालेल्या अपघातावेळी, आजूबाजूला बघ्यांची मोठी गर्दी झाली.
त्यावेळी अनेक लोक मदतीसाठी धावले. त्यादरम्यान तिथून राष्ट्रवादी काँग्रेस पक्षाचे अध्यक्ष शरद पवार यांचा ताफा बारामतीवरुन-पुण्याला चालला होता.
गर्दी पाहून पवारांनी गाडी थांबवून विचारपूस केली. त्यावेळी चाचर आणि उपस्थितांनी पवारांना घडलेली घटना सांगितली. त्यानंतर शरद पवारांनी नुकसानभरपाई संदर्भात संबंधितांशी लवकर संपर्क करावा अशा सूचना केल्या. (Sharad Pawar stops convoy)
बारामतीत शरद पवार- राजू शेट्टी यांची भेट
दरम्यान, शरद पवार यांच्या बारामती दौऱ्यावेळी स्वाभिमानी शेतकरी संघटनेचे नेते राजू शेट्टी यांनी दोनच दिवसापूर्वी त्यांची भेट घेतली होती. विधानपरिषदेच्या जागांबाबत त्यावेळी दोघांमध्ये चर्चा झाली. राजू शेट्टी यांना राष्ट्रवादीच्या कोट्यातून विधानपरिषदेवर पाठवण्याचा निर्णय त्यावेळी झाला. मात्र आता राजू शेट्टी यांनी अंतर्गत संघटनावादामुळे आपण विधानपरिषदेवर जाणार नाही अशी भूमिका घेतली आहे.
संबंधित बातम्या
गोविंद बागेत ठरलं, राजू शेट्टी राष्ट्रवादीच्या कोट्यातून विधानपरिषदेवर
