पुण्यात कोरोनाचा दुसरा बळी, परदेशात प्रवास न केलेल्या महिलेचा मृत्यू

पुणे : पुण्यात कोरोनाचा दुसरा बळी गेला (Pune Corona Patient died) आहे. पुण्यात एका ५० वर्षीय कोरोनाबाधित महिलेचा उपचारादरम्यान मृत्यू झाला आहे. नुकतंच पुण्याचे जिल्हाधिकारी दीपक म्हैसेकर यांनी याबाबतची माहिती दिली. यामुळे राज्यातील कोरोनाबाधित  मृतांची संख्या 20 वर पोहोचली आहे.

पुण्यात मृत्यू झालेल्या या महिलेचा काल कोरोनाचा रिपोर्ट (Pune Corona Patient died) पॉझिटिव्ह आला होता. या महिलेने कोणताही परदेशी प्रवास केला नव्हता. आज पुण्यातील रुग्णालयात उपचारादरम्यान तिचा मृत्यू झाला.

तर दुसरीकडे जळगावमध्ये आणखी एका कोरोना पॉझिटिव्ह रुग्णाचा मृत्यू झाला आहे. जळगावमध्ये मृत्यू झालेल्या या रुग्णाचा अहवाल काल कोरोना पॉझिटिव्ह आला होता. त्यानंतर त्याची प्रकृती खालावत गेली. नंतर उपचारादरम्यान त्यांचा मृत्यू झाला. जळगावच्या शासकीय वैद्यकीय महाविद्यालयाचे अधिष्ठाता डॉ भास्कर खैरे यांनी याबाबतची माहिती दिली.

राज्यात आतापर्यंत 20 जणांना कोरोनामुळे जीव गमावावे लागले आहेत. यातील सर्वाधिक मृत्यू हे मुंबईतील असून मुंबईत आतापर्यंत 13 जणांचा कोरोनामुळे मृत्यू झाला आहेत. तर पुणे, नवी मुंबई, बुलडाणा, पालघर, जळगाव या ठिकाणी प्रत्येकी एका व्यक्तीचा कोरोनामुळे मृत्यू झाला आहे.

कोरोनामुळे महाराष्ट्रात कुठे किती मृत्यू?

मुंबई – 64 वर्षीय वृद्धाचा मृत्यू – 17 मार्च
मुंबई – 63 वर्षीय वृद्धाचा मृत्यू – 22 मार्च
*मुंबई – फिलिपाईन्सच्या 68 वर्षीय वृद्धाचा मृत्यू– 23 मार्च (कोरोना निगेटिव्ह, मृत्यूचं कारण अन्य)*
मुंबई – 65 वर्षीय वृद्धाचा मृत्यू – 23 मार्च
मुंबई – एकाचा मृत्यू -25 मार्च
नवी मुंबई – वाशीतील 65 वर्षीय महिलेचा मृत्यू– 26 मार्च
मुंबई – 63 वर्षीय महिलेचा मृत्यू– 26 मार्च
बुलडाणा – 45 वर्षीय पुरुषाचा मृत्यू – 28 मार्च
मुंबई – 40 वर्षीय महिलेचा मृत्यू – 28 मार्च
पुणे – 52 वर्षीय व्यक्तीचा मृत्यू – 30 मार्च
मुंबई – 80 वर्षीय व्यक्तीचा मृत्यू – 30 मार्च
मुंबई – 65 वर्षीय वृद्धाचा मृत्यू – 31 मार्च
पालघर  – 50 वर्षीय पुरुषाचा मृत्यू – 1 एप्रिल
मुंबई – 51 वर्षीय पुरुषाचा मृत्यू – 1 एप्रिल
मुंबई – 84 वर्षीय महिलेचा मृत्यू – 1 एप्रिल
मुंबई – 73 वर्षीय महिलेचा मृत्यू – 1 एप्रिल
मुंबई – 63 वर्षीय महिलेचा मृत्यू – 1 एप्रिल
मुंबई – 56 वर्षीय पुरुषाचा मृत्यू – 1 एप्रिल
जळगाव – एका रुग्णाचा मृत्यू – 2 एप्रिल
अन्य एकाचा मृत्यू – 2 एप्रिल
अन्य एकाचा मृत्यू – 2 एप्रिल
पुणे : 50 वर्षीय महिलेचा मृत्यू – 2 एप्रिल

राज्यातील कोरोनाबाधितांचा आकडा चारशेच्या वर पोहोचला आहे. महाराष्ट्रात एकाच दिवसात 81 रुग्ण वाढले आहे. मुंबई, पुणे, पिंपरी चिंचवड, कल्याण डोंबिवली, अहमदनगर, बुलडाणा या शहरांमध्ये कोरोना रुग्णांची संख्या वाढत आहे. पुण्यात दोन, तर बुलडाण्यात एकाला कोरोनाची लागण झाल्याचं समोर आलं आहे. त्यामुळे कोरोनाबाधितांची संख्या 416 वर पोहोचली आहे. तर राज्यात आतापर्यंत 20 जणांना ‘कोरोना’मुळे प्राण गमवावे लागले (Pune Corona Patient died) आहेत.