नाशिकमध्ये मुथूट फायनान्सवर दरोड्याचा प्रयत्न, गोळीबारात ऑडिटर ठार, नांगरे-पाटील घटनास्थळी

नाशिक : नाशिकमध्ये दिवसेंदिवस चोरी, दरोड्यासह गुन्हेगारीच्या घटना वाढत आहेत. सिटी सेंटर मॉल जवळच्या मुथूट फायनान्स कार्यालयाजवळ आज गोळीबार झाला. चोरी करण्यासाठी आलेल्या चोरट्याने हा गोळीबार केला. या गोळीबारात गंभीर जखमी झालेल्या ऑडिटरचा मृत्यू झाला आहे. तर वॉचमनसह तीन जण जखमी आहेत. चोरट्याने राऊंड फायर केल्याने परिसरात एकच खळबळ उडाली.

नाशिकच्या उंटवाडी परिसरात मुथूट फायनान्स कंपनी आहे. यावर सकाळी सकाळीच दरोडा टाकण्यासाठी सशस्त्र दरोडेखोर आले होते. त्यांच्याकडे रिव्हॉल्वर होती. चोरट्यांना जे कोणी अडवेल, त्यांच्यावर ते फायरिंग करत होते. या फायरिंगमध्ये तीन जण जखमी झाले. यामध्ये वॉचमन आणि ऑडिटसाठी दक्षिणेकडून आलेल्या अधिकाऱ्याचा समावेश आहे. या अधिकाऱ्याला गंभीर जखमी अवस्थेत उपचारासाठी आणलं होतं, मात्र त्यांचा  मृत्यू झाला.

या सर्व प्रकारानंतर पोलिसांनी तातडीने सूत्रं फिरवली आहेत. पोलीस आयुक्त विश्वास नांगरे पाटील हे स्वत: घटनास्थळी दाखल झाले आहेत. मात्र दिवसा ढवळ्या वर्दळीच्या ठिकाणी हा गोळीबार झाल्याने परिसरात भीतीचं वातावरण आहे. संपूर्ण शहर या प्रकाराने हादरलं आहे.

IPS विश्वास नांगरे पाटील यांच्या नियुक्तीनंतर नाशिकमधील गुन्हेगारी आटोक्यात येईल, अशी भावना नाशिककरांची होती. मात्र दिवसेंदिवस गुन्हेगारी वाढत असल्याने पोलीस प्रशासनावर नाशिककर प्रश्नचिन्ह उपस्थित करत आहेत.

नाशिक शहरात नेमकं काय चाललंय असा प्रश्न सध्या नाशिककरांना पडतो आहे. एकीकडे शहरांमध्ये गुन्ह्यांची संख्या वाढत आहे, तर दुसरीकडे शहरातील गुंडांची मजल आता थेट पोलिस कर्मचाऱ्यांवर हात उचलण्यापर्यंत पोहचली आहे. मागील काही दिवसांपासून शहरातील गुन्ह्यांचा आढावा घेतला, तर चोरी, घरफोडी, गाड्यांची तोडफोड, पोलिसांवरील हल्ले अशा घटना कधी नव्हे त्या शहरात घडत आहेत.

संबंधित बातम्या 

नाशिकमध्ये विश्वास नांगरे पाटलांना गुन्हेगारांचं थेट आव्हान?  

नाशिकमध्येही हेल्मेटसक्ती लागू, विश्वास नांगरे पाटलांचा मोठा निर्णय 

महिलांच्या सुरक्षेसाठी निर्भया पथक, विश्वास नांगरे पाटलांचा कौतुकास्पद निर्णय  

हेल्मेटसक्ती : 18-35 वयोगट टार्गेट, ते कर्ते पुरुष असतात : विश्वास नांगरे पाटील 

दृश्यम चित्रपट पाहून खूनाचा कट, विश्वास नांगरे पाटलांकडून पर्दाफाश