त्वचा निरोगी आणि नैसर्गिकरित्या चमकदार बनवायचीये? तर आजपासूनच आहारात करा या पदार्थांचा समावेश

आजकाल अनेकांना मुरुमे, कोरडेपणा आणि त्वचेच्या इतर समस्यांना सामोरे जावे लागत आहे. सूर्यप्रकाश, अयोग्य आहार, पुरेसे पाणी न पिणे आणि काही दैनंदिन सवयींचाही त्वचेच्या आरोग्यावर परिणाम होऊ शकतो. जास्त प्रमाणात प्रक्रिया केलेले आणि अनहेल्दी पदार्थ खाल्ल्याने त्याचा परिणाम त्वचेवर होऊ शकतो. त्यामुळे निरोगी त्वचा टिकवून ठेवण्यासाठी केवळ बाह्य काळजी घेणे पुरेसे नाही.

आपल्या शरीराला मिळणाऱ्या पोषक तत्वांचा त्वचेच्या आरोग्यावरही परिणाम होतो. अनेक पदार्थांमध्ये अशी पोषक तत्वे असतात जी त्वचेला आतून पोषण देण्यास मदत करतात. आपल्या आहारात विशिष्ट पदार्थांचा समावेश केल्याने जीवनसत्त्वे , खनिजे, आरोग्यदायी फॅट्स आणि अँटीऑक्सिडंट्स मिळू शकतात. चला तर मग निरोगी आणि चमकदार त्वचेसाठी काय खावे, कोणते पदार्थ त्वचेला नुकसान पोहोचवू शकतात आणि निरोगी त्वचेसाठी कोणत्या गोष्टी लक्षात ठेवाव्यात हे सविस्तरपणे आपण आजच्या लेखात जाणून घेऊयात.

त्वचा निरोगी ठेवण्यासाठी या पदार्थांचे सेवन करा

क्लीव्हलँड क्लिनिकनुसार निरोगी त्वचा टिकवून ठेवण्यासाठी तुमच्या आहारात टोमॅटो, संत्री, शिमला मिरची, ब्रोकोली, स्ट्रॉबेरी आणि किवी यांचा समावेश करावा. या पदार्थांमध्ये व्हिटॅमिन सी आणि अँटीऑक्सिडंट्स असतात. व्हिटॅमिन सी शरीराला कोलेजन तयार करण्यास मदत करते, जे निरोगी त्वचेसाठी आवश्यक असलेले एक प्रथिन आहे. अँटीऑक्सिडंट्स शरीराला फ्री रॅडिकल्समुळे होणाऱ्या नुकसानापासून वाचवण्यासही मदत करतात. बदाम आणि सूर्यफुलाच्या बिया व्हिटॅमिन ई चे चांगले स्रोत आहेत, जे त्वचेला ऑक्सिडेटिव्ह नुकसानापासून वाचवण्यास मदत करू शकतात.

याव्यतिरिक्त, अक्रोड, चिया सीड्स आणि अळशीमध्ये ओमेगा-3 फॅटी ॲसिड असतात. हे त्वचेतील ओलावा टिकवून ठेवण्यास आणि दाह कमी करण्यास मदत करू शकतात. माशांमधूनही ओमेगा-3 फॅटी ॲसिड आणि प्रथिने मिळतात. कडधान्ये आणि संपूर्ण धान्यांमधून प्रथिने, फायबर आणि इतर आवश्यक पोषक तत्वे मिळतात. आपल्या आहारात विविध प्रकारच्या पदार्थांचा समावेश केल्याने त्वचेला आवश्यक पोषण मिळू शकते.

कोणते पदार्थ त्वचेला नूकसान पोहोचवू शकतात

क्लीव्हलँड क्लिनिकच्या मते , अत्यधिक प्रक्रिया केलेली किंवा शुद्ध केलेली साखर आणि उच्च ग्लायसेमिक इंडेक्स असलेले पदार्थ त्वचेचा दाह, जळजळ आणि मुरुमांच्या समस्या वाढवू शकतात आणि अकाली वृद्धत्वाला चालना देऊ शकतात.

त्यामुळे गोड पदार्थ, फास्ट फूड आणि आरोग्यासाठी हानिकारक फॅटयुक्त पदार्थ प्रमाणात खाणे उत्तम आहे. अति मद्यपानामुळे त्वचेच्या आरोग्यालाही नुकसान पोहोचू शकते.

निरोगी त्वचेसाठी या गोष्टी लक्षात ठेवल्या पाहिजेत?
‍
निरोगी त्वचेसाठी केवळ आहाराकडेच नव्हे, तर काही दैनंदिन सवयींकडेही लक्ष देणे आवश्यक आहे. भरपूर पाणी प्या, कारण शरीरातील पाण्याच्या कमतरतेमुळे त्वचा कोरडी होऊ शकते. उन्हात बाहेर जाताना सनस्क्रीन लावा आणि अति सूर्यप्रकाशात जाणे टाळा.

धूम्रपान आणि मद्यपान टाळणे हे तुमच्या त्वचेसाठी देखील चांगले आहे. तुमच्या आहारात फळे, भाज्या, संपूर्ण धान्य, सुकामेवा, बिया आणि कडधान्ये यांचा समावेश करा. जर तुम्हाला त्वचेच्या समस्या सतत जाणवत असतील तर त्वचारोग तज्ञाचा सल्ला घ्या.

( डिस्क्लेमर : या आर्टिकलमध्ये देण्यात आलेली माहिती व उपाय हे सामान्य ज्ञानावर आधारित आहेत. आमचा याला दुजोरा नाही. ते अवलंबण्यापूर्वी तज्ज्ञांचा सल्ला जरूर घ्यावा.)