नवरात्रीच्या उपवासात कुट्टूचं पीठ वापरताय? भेसळ ओळखण्यासाठी मदत करतील ‘या’ टिप्स
अनेक लोक नवरात्री उपवासात कुट्टूचे पीठ खातात. पण तुम्ही वापरत असलेले पीठ शुद्ध आहे की भेसळयुक्त, हे तपासण्यासाठी या काही टिप्स तुमची मदत करतील.
नवरात्रीच्या काळात देवीची पूजा, आराधना करण्यासोबतच अनेक भक्त ९ दिवस उपवास करतात. नवरात्रीच्या उपवासात फक्त साबुदाणा, राजगिरा पीठच नाही तर अनेक लोक कुट्टूचे पीठाचा देखील वापर करतात. कुट्टूच्या पिठात असलेले फायबर, प्रथिने, जीवनसत्त्वे आणि खनिजे हे आरोग्यासाठी खूप फायदेशीर ठरतात. पण या कुट्टूच्या पिठात जर भेसळ असेल किंवा ते जुने व खराब झालेले असेल तर ते आरोग्याला फायद्याऐवजी नुकसान करू शकते. त्यामुळे उपवासासाठी कुट्टूचे पीठ खरेदी करताना त्याची गुणवत्ता तपासणे महत्त्वाचे आहे. काही सोप्या गोष्टी लक्षात ठेवून तुम्ही पिठाची प्राथमिक तपासणी करू शकता.
रंगावरून ओळखा
कुट्टूच्या पिठाची गुणवत्ता तपासताना सर्वप्रथम त्याच्या रंगाकडे लक्ष द्या. पिठाचा रंग त्याच्या प्रकारानुसार आणि प्रक्रियेनुसार बदलू शकतो. मात्र, पिठात अचानक असामान्य रंग दिसत असेल, हिरवट किंवा राखाडी डाग असतील अथवा बुरशीसारखी चिन्हे दिसत असतील, तर ते पीठ वापरणे टाळा.
पाण्याच्या मदतीने करा प्राथमिक तपासणी
कुट्टूच्या पिठात भेसळ आहे का, याची प्राथमिक तपासणी करण्यासाठी एका पारदर्शक ग्लास घ्या. अर्धा ग्लास पाण्याने भरा. आता त्यात एक चमचा पीठ टाकून मिश्रण नीट ढवळा. त्यानंतर पिठाचे कण कसे पसरतात किंवा खाली बसतात, हे पाहा. पिठात कोणत्याही प्रकारची भेसळ केली असेल तर इतर गोष्टी पाण्यात तरंगायला लागतात आणि पीठ खाली स्थिरावते.
पॅकेटवरील लेबल काळजीपूर्वक वाचा
बाजारातून पॅकबंद कुट्टूचे पीठ खरेदी करताना पॅकेटवरील एफएसएसएआय (FSSAI) परवाना क्रमांक, उत्पादनाची तारीख, वापरण्याची अंतिम तारीख आणि घटकांची माहिती तपासा. पॅकेट व्यवस्थित सीलबंद आहे का, याचीही खात्री करा. मुदत संपलेले किंवा माहिती अपूर्ण असलेले पीठ खरेदी करणे टाळा.
पीठ मळताना त्याचा पोत तपासा
कुट्टूच्या पिठापासून पदार्थ बनवताना त्याचा पोत आणि वास लक्षात घ्या. पीठ नेहमीच्या तुलनेत वेगळे दिसत असेल, त्याला आंबूस किंवा बुरशीसारखा वास येत असेल, तर ते वापरू नका. मळताना पीठ विखुरले तर पीठात भेसळ झाली आहे. लक्षात ठेवा की शुद्ध कुट्टूचे पीठ कधीही विघटित होत नाही.
