VIDEO : एकाच वेळी 23 जणांचा अंत्यसंस्कार, अंतिम दर्शनासाठी नातेवाईकांची पायपीट, उस्मानाबादेत मनाला चटका लावणारं दृश्य

अंतिम दर्शनासाठी कुणी स्मशानभूमीच्या कम्पाउंडवर तर कुणी उंच डोंगरावर उभं राहून मयताचे अंतिम दर्शन घेण्याचा प्रयत्न करत होतं. त्यांचा हा प्रयत्न मनाला चटका लावणारा होता (23 corona positive patients funeral in Osmanabad at one time).

  • संतोष जाधव, टीव्ही 9 मराठी, उस्मानाबाद
  • Published On - 21:03 PM, 16 Apr 2021
VIDEO : एकाच वेळी 23 जणांचा अंत्यसंस्कार, अंतिम दर्शनासाठी नातेवाईकांची पायपीट, उस्मानाबादेत मनाला चटका लावणारं दृश्य

उस्मानाबाद : राज्यासह देशभरात कोरोनाचा प्रचंड उद्रेक बघायला मिळतोय. महाराष्ट्रात तर फार भीषण परिस्थिती आहे. कोरोनामुळे राज्यातील मृत्यू दरातही प्रचंड वाढ झालीय. उस्मानाबादेत तर आज (16 एप्रिल) दिवसभरात तब्बल 23 कोरोनाबाधित मृतदेहांवर अंत्यसंस्कार करण्यात आला. यावेळी स्मशानभूमीत मृतक रुग्णांच्या नातेवाईकांनी अंतिम दर्शन घेण्यासाठी मोठी गर्दी केली. अंतिम दर्शनासाठी कुणी स्मशानभूमीच्या कम्पाउंडवर तर कुणी उंच डोंगरावर उभं राहून मयताचे अंतिम दर्शन घेण्याचा प्रयत्न करत होतं. त्यांचा हा प्रयत्न मनाला चटका लावणारा होता (23 corona positive patients funeral in Osmanabad at one time).

अंत्यसंस्कार करण्यासाठी स्मशानभूमी सुद्धा अपुरी

एकाचवेळी इतक्या मोठ्या प्रमाणात अंतिम संस्कार करण्याची ही उस्मानाबाद जिल्ह्यातील दुसरी वेळ आहे. कोरोनाने मृत्यू झालेल्या प्रेतावर अंत्यसंस्कार करण्यासाठी स्मशानभूमी सुद्धा अपुरी पडत आहे. यापूर्वी 14 एप्रिलला 17 कोरोनाबाधित मृतदेहांवर एकाचवेळी अंत्यसंस्कार करण्यात आले होते. उस्मानाबाद जिल्ह्यात आजवर कोरोनाने 667 रुग्णांचा मृत्यू झाला आहे.

सरण रचण्यासाठी लाकडं कमी

उस्मानाबाद जिल्ह्यात कोरोनाची स्थिती दिवसेंदिवस बिकट होत चाललीय. कोरोनामुळे होणाऱ्या मृत्यूचं प्रमाणही चिंताजनक बनत आहे. स्मशानभूमीत आज जागा अपुरी पडत असल्यामुळे अवघ्या एक-एक फुटावर सरण रचण्यात आली होती. इतकंच काय तर सरण रचण्यासाठी लाकडं कमी पडत आहेत. त्यामुळे कमी लाकडांवरच मृतदेहांवर अंत्यविधी केले जात आहेत (23 corona positive patients funeral in Osmanabad at one time).

उस्मानाबाद जिल्ह्यात दिवसभरात तब्बल 764 नवे रुग्ण

उस्मानाबाद जिल्ह्यात कोरोनाबाधितांची संख्या प्रचंड वेगाने वाढत आहे. जिल्ह्यात आज दिवसभरात तब्बल 764 नवे कोरोनाबाधित रुग्ण आढळले. उस्मानाबाद तालुक्यात 451, तुळजापूर 72, उमरगा 57, लोहारा 17, कळंब 59, वाशी 36, भूम 40 आणि परंडा येथीस 32 रुग्णांची समावेश आहे. कोरोनाबाधितांचे हे नवे आकडे धडकी भरवणारे आहेत. याशिवाय उस्मानाबाद जिल्ह्यात आज दिवसभरात तब्बल 10 रुग्णांचा उपचारादरम्यान मृत्यू झाला.

उस्मानाबाद जिल्ह्यातील गेल्या महिन्याभरातील आकडेवारी

उस्मानाबाद जिल्ह्यात गेल्या महिन्याभरातील कोरोना रुग्णांच्या आकडेवारीचा अभ्यास केला तर मार्च महिन्यापासून सुरु झालेली ही आकडेवारी वाढत राहिली. 24 मार्चला ही आकडेवारी 176 वर होती. मात्र, आज ही आकडेवारी थेट 764 वर पोहोचली आहे.

24 मार्च – 176
25 मार्च – 174
26 मार्च – 155
27 मार्च – 224
28 मार्च – 184
29 मार्च – 239
30 मार्च – 242
31 मार्च – 253
01 एप्रिल – 283
02 एप्रिल – 292
03 एप्रिल – 343
04 एप्रिल – 252
05 एप्रिल – 423
06 एप्रिल – 415
07 एप्रिल – 468
08 एप्रिल – 489
09 एप्रिल – 564
10 एप्रिल – 558
11 एप्रिल – 573
12 एप्रिल – 680
13 एप्रिल – 590
14 एप्रिल – 613
15 एप्रिल – 764

संबंधित बातमी : उस्मानाबादेत स्मशानभूमीही गहिवरली! एकावेळी 19 मृतदेहांवर अंत्यसंस्कार, 8 मृतदेह अंत्यविधीच्या प्रतिक्षेत