अंत्यविधीसाठी निघालेले प्रेत थेट ग्रामपंचायतीच्या ओट्यावर, औरंगाबादच्या दिगर गावात कशाचा वाद पेटला?

औरंगाबादः जिल्ह्यातील पिशोर येथील दिगर गावातील लोकांनी काल एका ग्रामस्थाच्या मृत्यूनंतर मोठी आक्रमक भूमिका घेतली. संतप्त नातेवाईकांनी पिशोर ग्रामपंचायत कार्यालयासमोर अत्यंयात्र रोखून ठिय्या आंदोलन केले. जोपर्यंत स्मशानभूमीचा प्रश्न मार्गी लागत नाही, तोपर्यंत अंत्यविधी होणार नाही, अंत्ययात्र येथून हलणार नाही, असा पवित्रा घेतल्याने पिशोर येथे काही काळ तणावाचे वातावरण निर्माण झाले.

काय आहे स्मशानभूमीचा वाद?

पिशोर गावात एकूण चार ठिकाणी स्मशानभूमीसाठी जागा आहे. त्या भागातील लोकांना कुठल्याही परिस्थितीत अडचणी निर्माण होऊ नये, यासाठी जागा उपलब्ध करून देण्यात आल्या आहेत. पण दिगर भागातील लोकांना अंत्यविधीसाठी त्या ठिकाणी शेजारी असलेले शेतकरी जागा आमची असल्याचा दावा करत आहेत. त्यांनी अनेक वेळा लोकांशी याबाबत वाद घातले. मात्र त्यावर तोडगा निघाला नाही. दिगर भागातील शांताबाई सूर्यभान खडके यांचे शनिवारी निधन झाले. ही महिला महानुभाव पंथाची असल्याने त्यांना भूमी डाग द्यावा लागतो. अंत्यविधीसाठी दिगर स्मशानभूमीकडे नेत असताना तेथील नेहमीचा विरोध लक्षात घेता, लोकांनी अंत्ययात्र थेट ग्रामपंचायत कार्यालयासमोरच आणली. आम्हाला अंत्यविधीसाठी जागा उपलब्ध करून द्यावी, अशी मागणी लोकांनी केली.

तहसीलदारांच्या आश्वासनानंतर अंत्यसंस्कार

दरम्यान ग्रामपंचायतीवर मोठ्या संख्येने ग्रामस्थ आणि प्रेत आल्यामुळे पदाधिकाऱ्यांनी तहसीलदार यांच्याशी संपर्क साधला. तहसीलदारांनी स्मशानभूमीसाठी जागा उपलब्ध करून दिली जाईल, असे आश्वासन दिले. नंतर सदर महिलेवर अंत्यसंस्कार करण्यात आले.

इतर बातम्या-

Video : वरातीवेळीच नवरदेवाची पॅन्ट फाटली! लग्नात उपस्थित लोकही पोट धरुन हसले

VIDEO : Devendra Fadnavis | गोपीचंद पडळकर यांच्यावर झालेल्या हल्ल्याचा मुद्दा फडणीसांकडून विधानसभेत उपस्थित