मला हॉस्पिटमध्ये घेऊन चला… गर्भवती सूनेशी सासरच्यांची अमानूष वागणूक, नंतर जे काही झालं ते संतापजनक

सोनपावलांनी सून नाही लेक आणली… पण दुसऱ्याच्या लेकींना सासरी चांगली वागणूक मिळते का? यावर देखील लक्ष देणं फार महत्त्वाचं आहे. कारण चार भिंतींमध्ये काय सुरु असतं कोणालाही माहिती नसतं… आता देखील असंच काही घडलं आहे. सासरच्या माणसांच्या अमानूष मारहाणीत गर्भवती महिलेचा गर्भपात झाला आहे. ज्यामुळे एका निष्पाप जीवाचा जन्माआधीच मृत्यू झाला आहे. याप्रकरणी पोलिसांत गुन्हा देखील दाखल करण्यात आला आहे. तर पोलीस अधिक चौकशी करत आहेत.

ही धक्कादायक घटना, अमरावती जिल्ह्यातील अचलपूर तालुक्यात घडली आहे. याप्रकरणी पती, नणंद ,सासूविरुद्ध पथ्रोट स्टेशनमध्ये गुन्हा दाखल करण्यात आला आहे. पीडित महिलेने सासरच्यां विरोधात गंभीर आरोप केले आहेत. हुंड्यासाठी सतत मारहाण आणि छळ केल्याचे आरोप पीडित महिलेने केले आहेत.

मिळालेल्या माहितीनुसार, सासरच्या लोकांनी महिलेला बेदम मारलं, अशात ती गर्भवती असल्यामुळे, तिला त्रास सुरु झाला. पण मारहाण झाल्यानंतर महिला मला हॉस्पिटलमध्ये घेऊन चला… असं सतत म्हणत होती.. पण तिचं कोणीच ऐकलं नाही… धक्कादायक गोष्ट म्हणजे नवऱ्याने देखील पीडित महिलेला हॉस्पिटलमध्ये नेण्यास नकार दिला…

आजच्या दिवसांत घडलेली ही एकच घटना नाही. बीडमध्ये सासरच्या जाचाला कंटाळून एका महिलेने स्वतःचं आयुष्य संपवलं. मिळालेल्या माहितीनुसार, बीडमध्ये सासरच्या जाचाला कंटाळून मुस्कान वसीम शेख नामक विवाहितेने टोकाचे पाऊल उचलल्याची दुर्दैवी घटना समोर आली आहे.

माहेरून पैसे आणण्यासाठी तिचा शारीरिक व मानसिक छळ केला जात असल्याची तक्रार नातेवाईकांनी केली आहे. याप्रकरणी पोलिसांनी पती वसीम आयुब शेख याच्याविरुद्ध गुन्हा दाखल केला असून पुढील तपास सुरू केला आहे. कौटुंबिक छळामुळे घडलेल्या या घटनेमुळे परिसरात हळहळ व्यक्त होत आहे.

तर गेल्या वर्षी वैष्णवी हगवणे प्रकरणामुळे राज्यातील वातावरण तापलं होतं. पती, सासू, नणंद, सासरे यांच्या छळामुळे कंटाळून अवघ्या 23 वर्षांच्या वैष्णवीने 9 महिन्यांच्या लगहान मुलाला मागे सोडत आत्महत्या केली. अखेर पोलिसांनी कठोर कारवाई करत सर्वांना अटक केली.