ठाकरे गटाला सुरुंग लावणाऱ्या पदाधिकाऱ्यांवर मुख्यमंत्री एकनाथ शिंदे दिली मोठी जबाबदारी, सहसंपर्कप्रमुख आणि जिल्हाप्रमुख पदाच्या नियुक्त्या जाहीर

नाशिक : शिवसेना उद्धव बाळासाहेब ठाकरे अर्थातच शिवसेना ठाकरे गटाला नाशिकमध्ये सुरुंग लावलेल्या अजय बोरस्ते यांच्यासह राजू लवटे यांना मुख्यमंत्री एकनाथ शिंदे यांनी तोडीस-तोड जबाबदारी दिली आहे. या नियुक्त्या देण्यापूर्वी भाऊसाहेब चौधरी यांना थेट शिवसेनेच्या सचिव पदाची जबाबदारी दिली आहे. भाऊसाहेब चौधरी हे संजय राऊत यांचे निकटवर्तीय म्हणून ओळखले जात होते, त्यांच्याकडे नाशिकच्या संपर्कप्रमुख पदाची जबाबदारी होती. त्यानंतर आता जिल्हाप्रमुख आणि सहसंपर्कप्रमुख पदाच्या नियुक्त्या देखील जाहीर करण्यात आल्या आहे. दहाहून अधिक नगरसेवक आणि पन्नासहून अधिक पदाधिकारी आणि कार्यकर्ते यांना ठाकरे गटातून शिंदे गटात घेऊन गेल्याने अजय बोरस्ते यांना जिल्हाप्रमुख पदी मुख्यमंत्री एकनाथ शिंदे यांनी नियुक्ती केली आहे. तर सहसंपर्कप्रमुख पदी राजू लवटे यांची नियुक्ती केली आहे. ठाकरे गटाला भिडण्यासाठी तोडीस तोड पदाधिकारी मिळाल्याने मुख्यमंत्री यांनी बोरस्ते आणि लवटे यांना बक्षीस दिल्याचे बोललं जात आहे.

ठाकरे गटाकडे विजय करंजकर, सुधाकर बडगूजर, दत्ता गायकवाड, वसंत गीते, सुनील बागूल असे फायरब्रॅंड नेते असल्याने त्यांना तोडीस तोड ठरू शकतील अशा अजय बोरस्ते, राजू लवटे यांना जबाबदारी देण्यात आली आहे.

आमदार आणि खासदार जरी शिंदे गटात गेले असले तरी पदाधिकारी फारसे शिंदे गटात गेले नव्हते, त्यामुळे शिंदे गटाची स्थानिक पातळीवरील परिस्थिति फारशी चांगली नव्हती.

अजय बोरस्ते यांच्यासह भाऊसाहेब चौधरी हे शिंदे गटात दाखल झाल्याने बाळासाहेबांची शिवसेना अर्थातच शिंदे गटाची ताकद वाढली असून फायरब्रॅंड नेते मिळाले आहे.

अजय बोरस्ते यांना पालिकेच्या सभागृहापासून ते जाहीर सभेपर्यन्त भाषणं करण्याचा दांडगा अनुभव आहे, माध्यमांना प्रतिक्रिया देण्यासापासून आरोपावर प्रतिवार करण्यासाठी बोरस्ते कायमच अग्रस्थानी राहिले आहे.

थेट संजय राऊत यांनाच शिंगावर घेणाऱ्या अजय बोरस्ते यांनाच जिल्हाप्रमुख पदाची जबाबदारी द्यावी यासाठी दादा भुसे, भाऊसाहेब चौधरी, सुहास कांदे यांनी फिल्डिंग लावली होती.