...तरच विरोधी पक्षनेत्याच्या बोलण्याला महत्त्व असेल : एकनाथ खडसे

भाजपचे नेते आणि माजी विरोधी पक्षनेते एकनाथ खडसे यांनी देवेंद्र फडणवीस यांना विरोधी पक्षनेते म्हणून काम करताना काही महत्त्वाचे सल्ले दिले आहेत (Advice of Eknath Khadse to Devendra Fadnavis).

...तरच विरोधी पक्षनेत्याच्या बोलण्याला महत्त्व असेल : एकनाथ खडसे

जळगाव : भाजपचे नेते आणि माजी विरोधी पक्षनेते एकनाथ खडसे यांनी देवेंद्र फडणवीस यांना विरोधी पक्षनेते म्हणून काम करताना काही महत्त्वाचे सल्ले दिले आहेत (Advice of Eknath Khadse to Devendra Fadnavis). यात सरकारवर केवळ प्रसिद्धीसाठी आरोप न करण्याच्या सल्ल्याचाही समावेश आहे. विधीमंडळातील अधिवेशनात अनेक नेत्यांनी एकनाथ खडसे यांची आठवण काढली. त्यावर बोलताना त्यांनी ही प्रतिक्रिया व्यक्त केली.

राज्याच्या मुख्यमंत्रिपदी शिवसेना प्रमुख उद्धव ठाकरे विराजमान झाले आहेत. महाविकास आघाडीने विश्वासदर्शक ठराव देखील जिंकला. 169 आमदारांनी महाविकासआघाडीला पाठिंबा दिला. आज (1 डिसेंबर) विधानसभा अध्यक्षपदी काँग्रेसचे नाना पटोले यांची, तर विरोधी पक्षनेतेपदी देवेंद्र फडणवीस यांची निवड करण्यात आली. दरम्यान आज या निवड प्रसंगी अभिनंदनाचा ठराव करताना सर्व पक्षीय नेत्यांकडून माजी मंत्री आणि प्रदीर्घ काळ विरोधी पक्षनेते राहिलेल्या एकनाथ खडसेंची आठवण काढण्यात आली. याविषयी खडसे यांनी देखील आपल्या भावना व्यक्त केल्या.

एकनाथ खडसे म्हणाले, “केवळ प्रसिद्धीसाठी सरकारवर आरोप होऊ नये. पुराव्यानिशी पूर्ण अभ्यास करून सरकारवर आरोप केले पाहिजेत. तरच विरोधी पक्षनेत्याच्या बोलण्याला अधिक महत्त्व राहिलं. याची काळजी त्यांनी नेहमीच घेतली पाहिजे. माझं विरोधी पक्षनेते म्हणून काम पाहून राष्ट्रवादी काँग्रेसचे मंत्री जयंत पाटील, छगन भुजबळ, काँग्रेसचे मंत्री बाळासाहेब थोरात यांनी कौतुक केलं. तसेच माझ्या कामाची आठवण करून दिली. त्याच पद्धतीने देवेंद्र फडणवीस देखील यापेक्षा उत्तम काम करतील अशी मला आशा आहे.”

लोकांना माझी आठवण माजी महसूलमंत्री म्हणून नाही, तर माजी विरोधी पक्षनेता म्हणून आहे, असंही त्यांनी यावेळी नमूद केलं. तसेच माझा पक्षांतर करण्याचा काहीही विचार नसल्याचंही स्पष्ट केलं.

कमेंट करा

कमेंट करा

Your email address will not be published. Required fields are marked *