सहकाऱ्याच्या निधनाने जयंत पाटील गहिवरले, आठवणी जागवतानाच अश्रू अनावर

सांगली : जलसंपदा मंत्री आणि राष्ट्रवादीचे प्रदेशाध्यक्ष जयंत पाटील यांना सहकाऱ्याच्या अस्थी विसर्जनावेळी अश्रू अनावर झाले. राजारामबापू सहकारी साखर कारखान्याचे ज्येष्ठ संचालक जगदीश पाटील यांच्या अकाली निधनानंतर बोलताना जयंत पाटलांना गहिवरुन आले. (Jayant Patil gets emotional while reviving memories of Jagdish Patil)

जगदीश पाटील यांचे नुकतेच निधन झाले. त्यांच्या अस्थी विसर्जनाचा कार्यक्रम आज (रविवारी) पार पडला. या कार्यक्रमाला जयंत पाटील उपस्थित राहिले होते. जगदीश पाटील यांच्या कार्याविषयी बोलत असतानाच अचानक जयंत पाटील यांच्या अश्रूंचा बांध फुटला आणि ते काही काळासाठी जयंत पाटील स्तब्ध झाले.

“लोकनेते राजारामबापू पाटील यांच्याशी वैचारिक बांधिलकी असणारे अनेक जण मला लाभले. या लोकांच्या ताकदीनेच आज मी इथपर्यंत आलो आहे. मात्र तीच माणसं आज माझ्या हातून निसटत आहेत” याचं दुःख जयंत पाटील यांनी यावेळी बोलून दाखवलं.

कोरोनामुळे जगभरात अनेक जणांचा मृत्यू झाला आहे. भारतातही अनेकांचे निधन झाले आहे. राजारामबापू सहकारी साखर कारखान्याचे संचालक जे. वाय. पाटील, राजारामबापू दूध संघाचे संचालक जगन्नाथ पाटील, अशोक पाटील, इस्लामपूर शहराचे माजी नगराध्यक्ष विजय पाटील असे अनेक जवळचे सहकारी जयंत पाटील यांनी या कालखंडात गमावले आहेत.

महाराष्ट्राच्या राजकारणात लोकांमध्ये वावरणारा नेता म्हणून जयंत पाटील यांची ओळख आहे. आपल्या जवळच्या माणसांचे अकाली जाण्याने जयंत पाटील यांना मोठं दुःख झाल्याचं या कार्यक्रमात पाहायला मिळालं.

दरम्यान, जयंत पाटील यांनी आज वाळवा तालुक्यातील बागणी येथे कोविड सेंटरचे लोकार्पण केले. सुसज्ज व्यवस्था नागरिकांना नक्कीच दिलासा देईल अशी खात्री त्यांनी यावेळी व्यक्त केली.

वाळवा तालुक्यातील बागणी येथे कोविड सेंटरचे लोकार्पण केले. आपल्या भागात कोरोना आटोक्यात येत असला तरी सर्वसामान्य लोकांना योग्य आरोग्य सुविधा उपलब्ध व्हावी याकरीता मोफत उपचार देणारे हे कोविड सेंटर उभारले आहे. येथील सुसज्ज व्यवस्था नागरिकांना नक्कीच दिलासा देईल याची मला खात्री आहे. pic.twitter.com/R1LNVl5zeU

— Jayant Patil (@Jayant_R_Patil) October 18, 2020

संबंधित बातम्या :

काळजी करु नका, बऱ्या व्हाल, जयंत पाटलांकडून 90 वर्षीय कोरोनाबाधित आजींना धीर

व्हीलचेअरवर असूनही छगनरावांमुळे बजेट मांडलं, भुजबळांच्या वाढदिवशी जयंत पाटलांकडून अनोखी आठवण

(Jayant Patil gets emotional while reviving memories of Jagdish Patil)