बारवी धरणाजवळ कोळे गावाला बेटाचं स्वरुप, गावकऱ्यांना बोट प्रवासाशिवाय पर्याय नाही

मुरबाड : बदलापूरजवळ बारवी धरणाच्या (Baravi Dam) पाणलोट क्षेत्रात असलेल्या कोळे गावाला (Kole Village) बेटाचं स्वरुप आलं आहे. गावातून मुख्य रस्त्यावर येण्यासाठी गावकऱ्यांना जीव मुठीत धरुन बोटीने प्रवास करावा लागत आहे. कोळेवासी पुनर्वसनासाठी भूखंडाच्या प्रतीक्षेत आहेत.

कोळे गावाच्या तिन्ही बाजूंना बारवी धरणाच्या पाण्याचा वेढा पडला आहे, तर चौथी बाजू जंगलाने वेढलेली आहे. त्या मार्गावर दोन ओढे ओलांडावे लागत असल्याने गावकऱ्यांना गावाबाहेर ये-जा करण्यासाठी बोटीवर अवलंबून रहावं लागत आहे.

बारवी धरणाची उंची वाढल्यावर कोळे गावचा रस्ता पाण्यात बुडणार हे अधिकाऱ्यांना माहित होतं. त्यामुळे हे गाव विस्थापित करण्यासाठी नागरिकांना घराच्या नुकसान भरपाईची रक्कम देण्यात आली. परंतु त्यांचं पुनर्वसन करण्यासाठी जागा उपलब्ध नाही. तूर्तास महाराष्ट्र राज्य औद्योगिक विकास महामंडळाने लोकांना दोन रबरी होड्या दिल्या आहेत.

मुरबाड-बारवी डॅम रस्त्यावरील पशेणी गावापुढे तीन किलोमीटर अंतरावर कोळे गाव वसलेलं आहे. मुरबाडपासून हे अंतर केवळ आठ किलोमीटर अंतरावर आहे. कोळे गावात 150 घरं आहेत. शाळा-कॉलेजला जाणारे विद्यार्थी आणि नोकरदार यांना दररोज होडीने प्रवास करण्यावाचून पर्याय नाही.