कोरोनाबाधित पोलिसांचा आकडा वाढताच, एकाच दिवसात राज्यात 87 पोलीस पॉझिटिव्ह
आतापर्यंत 183 अधिकारी आणि 1575 पोलीस कर्मचाऱ्यांना कोरोनाची लागण झाली आहे. कोरोनाची लक्षणं असलेल्या पोलिसांची संख्या मोठी आहे. (Maharashtra Police Corona Positive)
मुंबई : राज्य पोलीस दलातील कोरोनाबाधित पोलिसांच्या संख्येत दिवसेंदिवस वाढच होताना दिसत आहे. आजच्या दिवसात 87 पोलीस कोरोना पॉझिटिव्ह आढळले. आतापर्यंत एकूण 1758 पोलीस अधिकारी आणि कर्मचाऱ्यांना कोरोनाची लागण झाली आहे. (Maharashtra Police Corona Positive)
काल एका दिवसात पाच पोलिसांना कोरोनाची लागण झाली होती, तर आज (रविवार 24 मे) 87 पोलिसांना लागण झाली आहे. एका दिवसात 200 पोलीस बरे होऊन घरी परतले आहेत, ही दिलासादायक बाबही आहे.
आतापर्यंत 183 अधिकारी आणि 1575 पोलीस कर्मचाऱ्यांना कोरोनाची लागण झाली आहे. कोरोनाची लक्षणं असलेल्या पोलिसांची संख्या मोठी आहे. 131 अधिकारी आणि 936 अशा एकूण 1067 पोलिसात लक्षणं दिसून येत आहेत. आतापर्यंत 18 कोरोनाग्रस्त पोलिसांचा मृत्यू झाला आहे. कालच्या दिवसात दोन पोलिसांचा मृत्यू झाला. यामध्ये ठाण्यातील श्रीनगर पोलीस स्टेशन येथील महिला कॉन्स्टेबलचा समावेश होता. तर 51 अधिकारी आणि 622 पोलीस कर्मचारी असे एकूण 673 जण बरे होऊन घरी परतले आहेत.
ठाण्यातील श्रीनगर पोलीस स्टेशन येथील कॉन्स्टेबल प्रतिभा गवळी यांच्या मृत्यूबद्दल कळविण्यास अत्यंत खेद होत आहे. त्या कोरोना व्हायरसशी झुंज देत होत्या.
पोलीस महासंचालक व महाराष्ट्र पोलीस दलाचे सर्व अधिकारी आणि कर्मचारी त्यांच्या कुटुंबियांप्रति सहानुभूती व्यक्त करत आहेत.
— Maharashtra Police (@DGPMaharashtra) May 23, 2020
संचारबंदीच्या काळात पोलिसांवर हल्ल्याच्या घटनेत वाढ होत आहे. पोलिसांवर 248 ठिकाणी झाले असून प्रकरणी 830 हल्लेखोर नागरिकांना अटक करण्यात आली आहे. काल 2 ठिकाणी पोलिसांवर हल्ले झालेत. आतापर्यंतच्या हल्ल्यात 86 पोलीस कर्मचारी आणि एक होमगार्ड गंभीर जखमी झाले आहेत.
लॉकडाऊन कालावधीत कोविड संदर्भात कलम 188 नुसार राज्यभरात एक लाख 13 हजार 893 गुन्हे दाखल झाले आहेत, तर 22 हजार 794 नागरिकांना अटक झाली असून 69 हजार 567 वाहनं जप्त करण्यात आली आहेत.
राज्यभरात पोलिसांनी हातावर क्वारंटाईन असा शिक्का असलेल्या 695 व्यक्तींना शोधून त्यांना विलगीकरण कक्षात पाठवलं आहे. अवैध वाहतूक करणाऱ्या 1322 वाहनांवर गुन्हे दाखल केले आहेत. या कालावधीत आरोपींकडून पाच कोटी 28 लाख रुपये दंड वसूल करण्यात आला आहे. राज्यभरात डॉक्टर आणि इतर वैद्यकीय सेवकांवर हल्ल्याच्या 40 घटना घडल्या आहेत. (Maharashtra Police Corona Positive)
