भाजपच्या गडात ठाकरे सरकारचे अष्टप्रधान!

नागपूर : भाजपचा गड असलेला विदर्भ काबीज करण्यासाठी, महाविकास आघाडीने विदर्भात ‘अष्टप्रधान’ नेमले आहेत. आगामी स्थानिक स्वराज्य संस्थांच्या निवडणुकीत भाजपचा पराभव करणे, विदर्भातील संघटन मजबूत करणे आणि भाजपचा गड असलेला विदर्भ ताब्यात घेणे या महाविकास आघाडीच्या मिशनसाठी ठाकरे सरकारने विदर्भातून आपले आठ मंत्री (Eight Ministers in Vidarbha) निवडले आहेत.

– विजय वडेट्टीवार – नितीन राऊत – सुनील केदार – यशोमती ठाकूर – अनिल देशमुख – बच्चू कडू – संजय राठोड – राजेंद्र शिंगणे

उद्धव ठाकरे सरकारचे हे विदर्भातील अष्टप्रधान आहेत. महाविकास आघाडी सरकाने विदर्भातून मंत्रिपदाची जबाबदारी दिलेले हे सर्व दिग्गज आणि मुरलेले नेते आहेत. या नेत्यांपैकी कुणी 15, तर कुणी 20 वर्षे विधानसभा गाजवली आहे. आता याच अष्टप्रधानांवर भाजपचा गड असलेला विदर्भ काबीज करण्याची जबाबदारी आहे.

महाविकास आघाडी सरकारने विदर्भात सात कॅबिनेट आणि एक राज्यमंत्रिपद दिलं. यातील सर्वाधिक चार कॅबीनेट मंत्री काँग्रेसचे आहेत. विरोधीपक्ष नेते आणि संघ मुख्यालयाचा जिल्हा असलेल्या नागपूर जिल्ह्यात ठाकरे सरकारचे तीन कॅबिनेट मंत्री आहेत. यात नितीन राऊत, सुनील केदार आणि राष्ट्रवादीचे नेते अनिल देशमुख यांचा समावेश आहे. यातूनच भाजपची पकड असलेल्या जिल्ह्यात संपूर्ण ताकद लावण्याची ठाकरे सरकारची योजना असल्याचं दिसून येत आहे.

विदर्भात विधानसभेच्या 62 जागा आहेत, त्यापैकी यावेळी 29 जागा भाजपला मिळाल्या, तर काँग्रेस दुसऱ्या क्रमांकावर आहे.

विदर्भात कुणाचे किती आमदार, कुणाला किती मंत्रिपदं? Eight Ministers in Vidarbha

काँग्रेस – 16 आमदार, 4 मंत्रिपदं राष्ट्रवादी – 6 आमदार, 2 मंत्रिपदं शिवसेना – 6 आमदार, 2 मंत्रिपदं

महाविकास आघाडी सरकारने विदर्भात आठ मंत्रिपदं दिली. शिवाय विधानसभेचं अध्यक्षपदही विदर्भाच्या वाट्याला आहे. खातेवाटपातही गृह, ऊर्जा यासारखी महत्त्वाची खाती विदर्भाच्या वाट्याला येण्याची शक्यता आहे. महाविकास आघाडीच्या मिशन विदर्भचं हे पहिलं पाऊल आहे, असंच राजकीय जाणकार सांगतात.

हेही वाचा : पक्षाला आमची लायकी वाटत नसेल : प्रताप सरनाईक

Eight Ministers in Vidarbha