छत्रपती आमचेही आदर्श आहेत, राजमुद्रेला विरोध करणाऱ्यांना मनसेचं उत्तर

मुंबई : “काही लोकांनी राजमुद्रेवरुन विरोध केला असेल पण माझी त्यांना विनंती आहे की, छत्रपती शिवाजी महाराजांना जसे तुम्ही आदर्श मानतात तसं आम्हीदेखील आदर्श मानतो. छत्रपतींचं राज्य हे लोककल्याणकारी राज्य होतं. तशाप्रकारचं लोककल्याणकारी राज्य निर्माण करण्यासाठीच राज ठाकरेंनी तो निर्णय घेतला आहे”, असा दावा मनसेचे ज्येष्ठ नेते बाळा नांदगावकर (Bala Nandgaonkar On MNS new flag)  यांनी केला.

मनसेच्या महाअधिवेशनात सर्वात अगोदर झेंड्याचं अनावरण करण्यात आलं. याबाबत नांदगाकर यांना प्रश्न विचारला असता, “आता भगवा आसमंतात दुमदुमणार आहे. सर्वांपर्यंत भगवा पोहोचावा म्हणून सगळ्यातआधी झेंड्याचं अनावरण करण्यात आलं, अशी माहिती त्यांनी दिली (Bala Nandgaonkar On MNS new flag) .

“‘विचार महाराष्ट्र धर्माचा, निर्धार हिंदवी स्वराज्याचा’ ही आता आमची टॅगलाईन आहे. भगवा झेंडा घेऊन आम्ही पुढे निघालो आहोत. झेंड्यावर राजमुद्रा आहे. त्याला अनुसरुनच राज ठाकरे आज मुद्दे मांडतील”, असे बाळा नांदगावकर म्हणाले.

महाराष्ट्रातील विद्यार्थी, महिला, शेतकरी अशा सगळ्यांच्या दृष्टीने जे महत्त्वाचे ठराव आहेत ते या अधिवेशनात मांडले जाणार आहेत, असेदेखील बाळा नांदगावकर यांनी सांगितलं.

महाराष्ट्र नवनिर्माण सेनेचं पहिलं महाअधिवेशन आज मुंबईत पार पडत आहे. या अधिवशेनात राज ठाकरे मनसेच्या पुढील वाटचालीबाबत महत्त्वाची घोषणा करणार आहेत. मनसेने आता हिंदुत्वाचा मुद्दा हातात घेतला आहे. मनसेच्या नव्या झेंड्याचं अनावरण करण्यात आलं आहे. हा झेंडा भगवा आहे आणि त्याच्यावर शिवरायांची राजमुद्रा आहे. याच राजमुद्रेला मराठा क्रांती मोर्चा आणि इतर संघटनांकडून विरोध केला जात आहे.