शिवतीर्थावर बाळासाहेब अवतरले, म्हणाले ‘आझाद मैदानात तो कुठला मेळावा?’

मुंबई | 24 ऑक्टोंबर 2023 : गेल्या वर्षीप्रमाणेच यंदाही शिवसेनेचे दोन मेळावे होत आहेत. आझाद मैदान येथे मुख्यमंत्री एकनाथ शिंदे यांचा तर शिवाजी पार्क येथे उद्धव ठाकरे यांचा असे दोन मेळावे होत आहेत. दोन्ही गटाच्या मेळाव्याला येण्यासाठी राज्याच्या कानाकोपऱ्यातून शिवसैनिक एकवटत आहेत. या मेळाव्याला सुरवात होण्यासाठी अवघे काही तास उरले आहेत. आझाद मैदान येथील मुख्यमंत्री एकनाथ शिंदे यांच्या मेळाव्यातील व्यासपीठावर दिवंगत शिवसेनाप्रमुख बाळासाहेब ठाकरे यांची खुर्ची ठेवण्यात आली आहे. पण, शिवाजी पार्क येथील दसरा मेळाव्यात खुद्द बाळासाहेब ठाकरे यांनी उपस्थिती लावली.

ठाण्यात सेंट्रल मैदान येथे 2012 साली बाळासाहेब ठाकरे यांची सभा झाली होती. ठाण्यातील ही बाळासाहेब ठाकरे यांची ही अखेरची सभा होती. या सभेत बाळासाहेब ठाकरे यांनी ज्या खुर्चीवरून भाषण केले. याच खुर्चीत बसून बाळासाहेब ठाकरे यांनी माझ्या उद्धवला सांभाळा असे भावनिक आवाहन केले होते. तीच खुर्ची आझाद मैदानातील दसरा मेळाव्यातील व्यासपीठावर ठेवण्यात आली आहे. गेल्यावर्षीही शिंदे गटाच्या एमएमआरडीए मैदानात झालेल्या दसरा मेळाव्यात ही खुर्ची ठेवण्यात आली होती. बाळासाहेबांची आठवण म्हणून ही खुर्ची ठेवण्यात आलीय.

एकीकडे शिवसैनिकांना भावनिक साद घालण्यासाठी शिंदे गटाने अशी तयारी केली आहे. तर, दुसरीकडे शिवाजी पार्क म्हणजेच शिवतीर्थावर बाळासाहेब ठाकरे यांनी उपस्थिती लावली. बाळासाहेब ठाकरे यांच्यासारखा चष्मा, गळ्यात रुद्राक्षांच्या माळा, तशीच दाढी. बाळासाहेब यांच्यासारखे दिसणारे हे हुबेहूब व्यक्तिमत्व आहे पुण्याचे कांतीभाई मिश्रा. बाळासाहेब यांचे ते निस्सीम भक्त. पुण्यात अनेकदा बाळासाहेब ठाकरे यांची त्यांनी भेट घेतली होती.

ठाकरे गटाच्या मेळाव्यासाठी कांतीभाई मिश्रा शिवतीर्थावर आले. हा मेळावा एकनिष्ठ शिवसैनिकांचा मेळावा आहे. कोणतीही भावना घेऊन आलो नाही. मी दर वर्षी येत असतो. बाळासाहेब यांच्यानंतर आता उद्धव ठाकरे, आदित्य ठाकरे यांच्यासोबत काम करत आहे. शिवसेनेचा आझाद मेदानातील मेळावा का खरा शिवसेनेचा मेळावा नाही. शिवसेना एकच आहे तो म्हणजे उद्धव ठाकरे यांचा.

बाळासाहेब ठाकरे यांच्यासारखा दिसतो ही परमेश्वराची लीला आहे. मला पाहून अनेकांना मोठ्या साहेबांची आठवण येते. मी धन्य मानतो. तिकडची शिवसेना ही खरी शिवेसना नाही, चार इकडचे घेतले, चार तिकडचे घेतले म्हणजे काही शिवसेना होत नाही असा टोला त्यांनी शिंदे गटाला लगावला. निवडणूक येऊ द्या म्हणजे शिवसेनेची खरी ताकद कळेल, असे आव्हानही त्यांनी दिले.