एच. के. पाटील यांनी घेतली बाळासाहेब थोरात यांची भेट; गैरसमज दूर होणार का?

मुंबई : काँग्रेस प्रदेश अध्यक्ष नाना पटोले (Nana Patole) आणि बाळासाहेब थोरात (Balasaheb Thorat) यांच्यामधील वाद विकोपाला गेला होता. बाळासाहेब थोरात यांनी विधिमंडळ पक्षनेते पदाचा राजीनामा पक्षाकडं पाठविला. त्यानंतर त्या वादावर पडदा पाडण्याचं काम पक्ष नेतृत्व करत आहे. त्या पार्श्वभूमिवर काँग्रेसचे महाराष्ट्र प्रभारी एच. के. पाटील राज्यात आले. त्यांनी पटोले आणि थोरात यांच्याशी सविस्तर चर्चा केली. बाळासाहेब थोरात यांच्या वरळीतील निवासस्थानी एच. के. पाटील (H. K. Patil) यांची बैठक झाली. यानंतर माध्यमांशी बोलताना काँग्रेसचे महाराष्ट्र प्रभारी एच. के. पाटील म्हणाले, मी चार दिवसांपूर्वी पक्षनेतृत्वाशी चर्चा केली. काँग्रेसचे प्रदेश अध्यक्ष नाना पटोले यांना भेटलो. त्यावेळी मी त्यांच्याशी सविस्तर चर्चा केली.

वेगवेगळ्या कारणाने पटोले आणि थोरात यांच्यात गैरसमज निर्माण झाले होते. हा पक्षाचा अंतर्गत विषय आहे. बाळासाहेब थोरात यांच्याशीही माझी सविस्तर चर्चा झाली.

थोरात रायपूर येथील बैठकीत उपस्थित राहणार

बाळासाहेब थोरात हे काँग्रेसचे अध्यक्ष मल्लिकार्जुन खर्गे यांच्याशी चर्चा करणार आहेत. आता गैरसमज दूर झाले आहेत. काँग्रेस हा एक परिवार आहे. समस्या येत असतात. ही समस्या आम्ही लवकरच सोडवू. बाळासाहेब थोरात रायपूर येथील बैठकीला उपस्थित राहणार आहेत, असंही एच. के. पाटील यांनी सांगितलं.

गैरसमज दूर करता येतो

पक्षाच्या अंतर्गत काही समस्या असतात. राजीनाम्याला मान्यता देण्याचा विचार नाही. गैरसमज झाला असेल तर तो सोडविता येतो. हायकमांडलाही ही बाब कळविण्यात आली आहे.

सत्यजित तांबेविषयी बैठकीत चर्चा नाही

आजच्या बैठकीत सत्यजित तांबे यांचा विषय नव्हता. त्यामुळं सत्यजित तांबे यांच्याविषयी आम्ही आजच्या बैठकीत कोणतीही चर्चा केली नाही. असंही एच. के. पाटील यांनी स्पष्ट केलं. यावेळी बाळासाहेब थोरात उपस्थित होते.

थोरात हे खर्चे यांचीही भेट घेणार

बाळासाहेब थोरात हे काँग्रेसचे अध्यक्ष मल्लीकार्जून खर्गे यांच्याशी रायपूर येथील पक्षाच्या बैठकीत चर्चा करतील, असंही एच. के. पाटील यांनी सांगितलं. आता या दोन नेत्यांमध्ये समोपचार कसा घडून येतो. हे पाहावं लागेल.