मुंबईकरांच्या चिंतेत वाढ, वरळीत राहणाऱ्या केईएममधील डॉक्टरला कोरोनाची लागण

मुंबई : मुंबईत कोरोनाचा विळखा दिवसेंदिवस वाढत चालला (Kem Doctor Corona Positive) आहे. वरळी, धारावी यासारख्या दाटीवाटीच्या परिसरात कोरोनाचा शिरकाव झाल्यानंतर आता रुग्णालयातील डॉक्टर आणि नर्सच्या कोरोना टेस्ट पॉझिटिव्ह येत आहे. नुकतंच परळच्या केईएम रुग्णालयातील एका डॉक्टरला कोरोनाची लागण झाल्याच स्पष्ट झालं आहे. त्यामुळे मुंबईकरांमध्ये भीतीचे वातावरण पाहायला मिळत आहे.

मुंबईतील परळ भागातील केईएम रुग्णालयात काम करणाऱ्या एका 47 वर्षीय डॉक्टरला (Kem Doctor Corona Positive) कोरोनाची लागण झाली आहे. कोरोनाची लागण झालेला हा डॉक्टर वरळी परिसरात राहतो.

या डॉक्टरला मंगळवारी (7 एप्रिल) श्वास घेण्यास त्रास होत होता. त्यामुळे त्यांना रुग्णालयात दाखल करण्यात आले. त्याच दिवशी त्यांची कोरोना टेस्ट घेण्यात आली. या चाचणीचा अहवाल पॉझिटिव्ह आला. त्यानंतर त्यांना कोरोना कक्षात हलवण्यात आलं.

राज्यात कोरोनाचे 1135 रुग्ण

कोरोना विषाणूने देशासह राज्यात हाहा:कार माजवला आहे. राज्यात दिवसेंदिवस कोरोनाबाधितांचा आकडा हा वाढतच आहे. राज्यातील कोरोनाबाधितांचा आकडा आता 1,135 वर येऊन पोहोचला आहे, अशी माहिती आरोग्य मंत्री राजेश टोपे यांनी दिली.

यात सर्वाधिक रुग्ण हे मुंबईतील आहेत. मुंबईत 748 जणांना कोरोनाची लागण झाली आहे. तर दुसरीकडे राज्यात 72 कोरोना रुग्णांचा मृत्यू झाला आहे. यात मुंबईत 45 कोरोना रुग्णांचा मृत्यू झाला (Kem Doctor Corona Positive) आहे.